जळगाव मिरर | २२ जून २०२५
यावल तालुक्यातील मोहराळा येथील गेल्या पाच दिवसांपासून बेपत्ता असलेल्या 19 वर्षीय तरुणाचा शुक्रवारी विहिरीत मृतदेह आढळून आला. कुटुंबियांनी घातपाताचा संशय व्यक्त केला आहे. या घटनेमुळे गावात प्रचंड तणाव निर्माण होत संतप्त जमावाने एकाचे चारचाकी वाहन फोडले असून घटनेची माहिती मिळताच पोलिसांचे पथक गावात दाखल झाले. एका कुटुंबातील काही जणांना पोलिसांनी चौकशीकरता ताब्यात घेतले आहे. मोहराळा गावातील साहिल शब्बीर तडवी (वय 19) हा 16 जूनपासून बेपत्ता झाला होता. त्याचा शोध घेण्यात आला मात्र, तो कुठेच मिळून आला नाही. म्हणून यावल पोलिसात हरवल्याची तक्रार नोंदवली होती.
दरम्यान, या तरुणाचा मृतदेह शुक्रवारी मोहराळा गावापासून वड्रीकडे जाणाऱ्या रस्त्यावरील शेत विहिरीत मिळून आला. तरुणाच्या मृतदेहाची माहिती गावात मिळताच जमावाने गावातील एका कुटुंबावर घातपाताचा संशय व्यक्त करीत त्यांच्या घराबाहेरील चारचाकी वाहनाची तोडफोड केली. घटनेची माहिती मिळताच पोलिस निरीक्षक रंगनाथ धारबळे, हवालदार वासुदेव मराठे, हवालदार सुनील पाटील, अमित तडवी हे दाखल झाले.
पोलिसांनी गावातील काही जणांना ताब्यात घेतले आहे. रात्री 8.15 वाजेच्या सुमारास मृतदेह विहिरीतून बाहेर काढला असून कुटुंबियांनी इन कॅमेरा शवविच्छेदनाची मागणी केली आहे. त्यानुसार पोलिसांनी मृतदेह यावल ग्रामीण रुग्णालयात आणला होता तर गावात हवालदार नीलेश चौधरी, मोहन तायडे, अल्लाउद्दीन तडवी, भरत कोळी, सागर कोळी यांसह कर्मचारी तैनात केले आहे
