जळगाव मिरर | १ ऑक्टोबर २०२३
२२ वर्षीय तरुणाने विहरीत उडी घेवून आपली जीवनयात्रा संपविल्याची घटना शनिवारी दुपारच्या सुमारास जळगाव तालुक्यातील सुभाषवाडी परिसरात घडली. पवन भिका जाधव असे मयत तरुणाचे नाव आहे. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, जळगाव तालुक्यातील सुभाषवाडीमध्ये पवन जाधव हा तरुण कुटुंबियांसह वास्तव्यास होता. शनिवारी सकाळी तो कुटुंबियांना मी बाहेर जातो असे सांगून घरातून निघाला. त्यानंतर त्याचा भाऊ आणि वडील हे कामावर निघून गेले. त्यानंतर बराच वेळ झाला तरी पवन हा घरी न आल्यामुळे त्याच्या कुटुंबियांनी संपुर्ण गावात आणि नातेवाईकांकडे पवनचा शोध घेतला. मात्र तरी देखील तो मिळून न येत असल्याने त्यांनी गावातील शेतांमध्ये पवनच्या शोध घेण्यासाठी निघाले.
गावाजवळ असलेल्या दिनेश चव्हाण यांच्या शेतातील विहरीजवळ पवनच्या अंगातील शर्ट, बुट आणि तंबाखूची पुडी पडलेली दिसून आली. दरम्यान, पवनच्या कुटुंबियांनी विहरीत डोकावून पाहिले असता, त्यांना पवनचा मृतदेह तरंगतांना दिसून आला. त्यांनी लागलीच पट्टीच्या पोहणाऱ्यांना बोलावून पवनचा मृतदेह बाहेर काढला. पवनच्या पश्चात आई, वडील, भाऊ दोन बहिणी असा परिवार आहे. घटनेची माहिती मिळताच एमआयडीसी पोलीस ठाण्याचे कर्मचारी अतुल पाटील, शाबाद सैय्यद यांनी घटनास्थळी धाव घेतली. त्यानंतर पंचनामा करुन मृतदेह शासकीय वैद्यकीय महाविद्यालयात दाखल केला. याठिकाणी वैद्यकीय अधिकारी डॉ. रेणुका भंगाळे यांनी पवनची तपासणी करीत मयत घोषीत केले. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
