औरंगाबाद: म्हणतात ना प्रेम आंधळे असते, पण याच आंधळ्या प्रेमाचा फायदा घेऊन एका २१ वर्षीय तरुणाने अनेक मुलींना लाखो रुपयांचा गंडा घातला. त्याची प्रेम कहाणी ऐकून पोलिसांना सुद्धा धक्का बसला. कारण हा तरुण मुंबईतील १६ वर्षांच्या मुलीला प्रेमाच्या जाळ्यात ओढत तिच्या आईचे ५ लाखांचे सोने घेऊन फरार झाला. विशेष म्हणजे त्याने आतापर्यंत अशा अनेक तरुणींना प्रेमाच्या जाळात अडकवून फसवले आहे. प्रफुल्ल रमेश जगताप (२१, रा. माऊलीनगर, बीड बायपास) असे आरोपी प्रियकराचे नाव आहे.
याबाबत अधिक माहिती अशी की, प्रफुल्ल हा मुंबईतील गोवंडी भागातील इमारतीमध्ये राहत होता. त्याच इमारतीमधील एका व्यावसायिक दाम्पत्याच्या १६ वर्षांच्या अल्पवयीन मुलीस त्याने प्रेमाच्या जाळ्यात ओढले. दरम्यान आपल्या घरी कार्यक्रम असल्याचे सांगत, तिच्या आईची एक सोन्याची पोत आपल्या आईला घालण्यासाठी देण्याची मागणी केली. मुलीनेही त्याला आपल्या घरी नेत घरातील कपाट उघडले. याचवेळी घरात असलेल्या सोन्याच्या दागिन्यांवर प्रफुल्लची नजर पडली आणि तो मुलीला धक्का देत सोने घेऊन फरार झाला. तेव्हापासून पोलीस त्याला शोधत होते. मात्र अखेर औरंगाबाद शहर पोलिसांनी प्रफुल्लला पकडले.
अनेक मुलींना लावला चुना
विशेष म्हणजे चोरी केलेले सोने प्रफुल्लने आपल्या दुसऱ्या एका मैत्रीणीच्या मदतीने सोनाराकडे गहाण ठेवले होते. तसेच त्याच्या मोबाईल फोनमध्ये अनेक गर्लफ्रेंडची छायाचित्रे सुद्धा आढळून आली. त्यामुळे प्रफुल्लने यापूर्वी सुद्धा अनेक मुलींना अशाचप्रकारे फसवले असल्याचा संशय पोलिसांना आहे. आता या प्रकरणातील चौकशीदरम्यान याबाबत अनेक खुलासे होऊ शकतात. पण त्याच्या या प्रेम कहाण्या ऐकून पोलिस सुद्धा चक्रावले होते.
