नवी दिल्ली : चेक रिपब्लिक देशातली लग्झरी वाहन उत्पादक कंपनी स्कोडा भारतीय वाहन बाजारात चांगली कामगिरी करत आहे. कंपनीने जानेवारी ते जून २०२२ या सहा महिन्यांच्या कालावधीत भारतीय वाहन बाजारात ५२ हजार ६९८ वाहनांची विक्री केली आहे. गेल्या वर्षीच्या याच सहा महिन्यातील विक्रीचा विचार करता कंपनीने तब्बल २०० टक्के अधिक वाहनांची विक्री केली आहे. दरम्यान, या वर्षाच्या उरलेल्या सहा महिन्यात कंपनीला आपली विक्री आणखी वाढवायची आहे. यासाठी कंपनीने “आधी कार खरेदी करा, नंतर पैसे द्या”, अशा स्वरुपाची ऑफर सादर केली आहे. कंपनीने ही ऑफर आपली लक्झरी एसयूव्ही स्कोडा कुशाकसाठी (Skoda Kushak) सादर केली आहे. विशेष म्हणजे कुशाक ही कंपनीने पूर्णपणे भारतात बनवलेली कार आहे.
कंपनीने स्कोडा कुशाक कारवर “आधी कार खरेदी करा, नंतर पैसे द्या”, अशा स्वरुपाची ऑफर सादर केली आहे. या ऑफरअंतर्गत ग्राहक या (जुलै) महिन्यात ही एयूव्ही खरेदी करू शकतात आणि ऑक्टोबरपासून कारचे पैसे ईएमआयद्वारे भरु शकतात. ही ऑफर केवळ याच (जुलै) महिन्यापुरती मर्यादित आहे. म्हणजेच ही SUV खरेदी करण्यासाठी तुमच्याकडे आत्ता पुरेसं बजेट नसलं तरीही तुम्ही ही शानदार कार खरेदी करू शकता.
कंपनीने जाहीर केलेल्या ऑफरचा लाभ घेण्यासाठी ग्राहकांना फायनान्स कंपनी किंवा बँकेने लागू केलेले सर्व निकष पूर्ण करावे लागतील. तसेच या ऑफरमध्ये कोणत्याही अॅक्सेसरीजचा समावेश करण्यात आलेला नाही. म्हणजेच, तुम्हाला ज्या अॅक्सेसरीज घ्यायच्या असतील त्याचे पैसे आत्ताच द्यावे लागतील. या ऑफरशी संबंधित सर्व डीटेल्स जाणून घेण्यासाठी तुम्ही स्कोडा डीलरशीपला भेट देऊ शकता.
