अंबरनाथ: अंबरनाथचे शिवसेनेचे बंडखोर आमदार डॉ. बालाजी किणीकर आणि अंबरनाथ शहरातील शिवसेनेची महिला आघाडी बुधवारी अंबरनाथ नगरपालिकेच्या मुख्यालयात आमने-सामने आल्याचे दिसून आले. यावेळी शिवसेनेच्या महिला कार्यकर्त्यांनी आमदार डॉ. बालाजी किणीकर यांच्याविरुद्ध घोषणाबाजी केली. त्यामुळे अंबरनाथ नगरपालिका मुख्यालयात एकच गोंधळ उडालेला पाहिला मिळाला.
आमदार किणीकर हे पहिलेपासून कट्टर मुख्यमंत्री एकनाथ शिंदे समर्थक मानले जातात. सर्व आमदार यांनी बंड केल्यानंतर सुरतला गेले यात पण बालाजी किणीकर होते. नंतर गुवाहाटी, मग गोवा आणि मुबंईला आले. आता बालाजी किणीकर यांनी आपल्या मतदारसंघात कामाला सुरुवात केली आहे. मात्र, शहरातील प्रश्न घेऊन पालिकेत आले असताना आमदार दुसऱ्या सभागृहात पत्रकार परिषद कसे घेऊ शकतात, असा प्रश्न उपस्थित करत महिलांनी त्यांना विरोध केला. तर आपण समस्यांबाबत मला कळवले नाही, मीही आलो असतो , असे यावेळी डॉ. किणीकर घोषणाबाजी करणाऱ्या महिला शिवसैनिकांना म्हणाले.
बुधवारी आमदार डॉ. किणीकर यांनी अंबरनाथ नगरपालिका मुख्यालयात नव्याने मंजूर झालेल्या कामांबाबत माहिती देण्यासाठी पत्रकार परिषद आयोजित केली होती. मात्र, आमदार डॉ. किणीकर यांची पत्रकार परिषद सुरू होण्यापूर्वीच शिवसेनेच्या महिला आघाडीच्या कार्यकर्त्या अंबरनाथ नगरपालिकेत हजर झाल्या. शहरातील शौचालय दुरावस्था, विविध ठिकाणी तुंबणारे पाणी, औषध फवारणी आणि गढूळ पाणी या समस्या घेऊन या महिला आघाडीने अंबरनाथ नगरपालिकेचे अतिरिक्त मुख्याधिकारी डॉ. प्रशांत शेळके यांच्या कार्यालयात ठाण मांडले.
पालिकेचे मुख्याधिकारी येत नाहीत तोपर्यंत आम्ही येथून जाणार नाही अशी भूमिका त्यांनी घेतली. त्याचवेळी पालिकेच्या दुसऱ्या सभागृहात आमदार डॉ. बालाजी किणीकर, पालिकेचे मुख्याधिकारी डॉ. प्रशांत रसाळ आणि पालिका अभियंत्यांच्या उपस्थितीत पत्रकार परिषद सुरू झाली. यावेळी शहरात मंजूर झालेल्या दोन रस्त्यांच्या कामाची माहिती देण्यात आली. पत्रकार परिषद संपेपर्यंत या महिला कार्यालयात होत्या. पत्रकार परिषद संपवून आमदार डॉ. किणीकर सभागृहाबाहेर येताच शिवसेनेच्या महिला आघाडीच्या सदस्यांनी त्यांना गराडा घातला.
