जळगाव मिरर | २ सप्टेंबर २०२३
देशाला हादरविणारी घटना राजस्थानमध्ये घडल्याचे समोर आले आहे. या ठिकाणी एका महिलेला निर्वस्त्र करीत पीडितेच्या पतीनेच महिलेला गावकऱ्यांसमोर 1 किमी पळायला लावले असून हि घटना दि.३१ ऑगस्ट रोजी राजस्थानमधील प्रतापगड जिल्ह्यातील धारियावाडमध्ये घडली आहे. शुक्रवारी हा व्हिडिओ व्हायरल झाल्यानंतर हे प्रकरण उघडकीस आले.
मिळालेल्या माहितीनुसार, महिलेच्या लग्नानंतर सहा महिन्यांनी तिला शेजारच्या उपला कोटा गावातील एका तरुणाने पळवून नेले होते. 30 ऑगस्ट रोजी ही महिला वर्षभरानंतर तरुणासोबत परतली तेव्हा तिच्या सासरच्यांनी तिला जबरदस्तीने पहाडा गावात आणले. यानंतर पतीने गावकऱ्यांसमोर तिचे कपडे काढले आणि तिची विवस्त्र परेड केली. व्हायरल झालेल्या व्हिडीओमध्ये ती जोरजोरात रडत सोडून देण्याची विनवणी करताना दिसत आहे. या वेळी गावातील अनेक लोक उपस्थित होते, पण त्याला कोणीही अडवले नाही. पीडित महिला सहा महिन्यांची गर्भवती आहे. पीडितेने 1 सप्टेंबरच्या रात्री धारियावाड पोलिस ठाण्यात पतीसह 14 जणांविरुद्ध तक्रार दाखल केली.
एसपी अमित कुमार यांनी सांगितले की, दीड वर्षांपूर्वी या गावातील तरुणाशी महिलेचा विवाह झाला होता. या घटनेवर मुख्यमंत्री अशोक गेहलोत म्हणाले की, सुसंस्कृत समाजात अशा गुन्हेगारांना स्थान नाही. महिलेने रात्री उशिरा पोलिसांत तक्रार केली. यानंतर एफआयआर नोंदवण्यात आला आहे. त्यात 14 जणांची नावे आहेत. पोलिसांनी पतीसह 3 जणांना अटक केली आहे. कारवाई करत पोलिसांनी शुक्रवारी महिलेचा पती आणि तीन आरोपींना त्यांच्या गावाजवळील जंगलातून अटक केली. तर उर्वरित आरोपींना पकडण्यासाठी पोलिसांची सहा पथके तयार करण्यात आली आहेत.
