जळगाव मिरर | ३ सप्टेंबर २०२३
भुसावळ – यावल रस्त्यावर एका पेट्रोल पंपाच्या जवळ दोन दुचाकींची समोरासमोर धडक झाल्याने या अपघातात तीन जण गंभीर जखमी झाले. या तिघांना जखमी अवस्थेत यावल ग्रामीण रुग्णालयामध्ये उपचारार्थ दाखल करण्यात आले. या ठिकाणी त्यांच्यावर प्रथमोपचार करण्यात आले व यातील दोघांची प्रकृती गंभीर असल्याने दोघांना पुढील उपचाराकरीता जळगाव जिल्हा शासकीय वैद्यकीय महाविद्यालयाच्या रुग्णालयामध्ये हलवण्यात आले.
मिळालेल्या माहितीनुसार, यावल-भुसावळ रस्त्यावरील पेट्रोल पंपाजवळ दुचाकीद्वारे केतन हरी पारधे (3म) व अबू साले इस्ताक अहमद (42) हे भुसावळकडे जात असताना भुसावळकडून ललित भागवत बोंडे (28, किन्ही, ता.भुसावळ) हा यावलकडे येत असताना दोन्ही दुचाकीत धडक होवून तिघे जखमी झाले. तातडीने नागरीकांच्या मदतीने यावल ग्रामीण रुग्णालयामध्ये जखमींना उपचारार्थ हलवण्यात आल्यानंतर डॉ.शिवदास चव्हाण, डॉ.इरफान खान, अधिपरीचारीका माधुरी ठोके, सुमन राऊत, बापू महाजन, अमोल अडकमोल, प्रवीण बारी आदींनी जखमींवर प्रथमोपचार केले तर यातील केतन पारधे व ललित बोंडे या दोघांची प्रकृती गंभीर असल्याने या दोघांना जळगाव जिल्हा शासकीय वैद्यकीय महाविद्यालयाच्या रुग्णालयात हलवण्यात आले.
