जळगाव मिरर | ४ सप्टेंबर २०२३
चोपडा शहरातील समाज मंदिराच्या बाजूला असलेल्या जागेवर पत्रे लावल्याच्या कारणावरून दोन गटांत वाद झाला. याचे रूपांतर हाणामारीत होऊन एकमेकांवर दगडफेक करण्यात आली. याप्रकरणी २० ते २२ जणांविरुद्ध गुन्हा दाखल करून सात जणांना अटक करण्यात आली आहे. ही घटना शनिवारी रात्री ११:३० वाजता चोपडा शहरातील पंचशीलनगरात घडली.
पंचशीलनगर येथील समाज मंदिराच्या बाजूला असलेल्या जागेला समोरून पत्रे का लावले, कोणी लावले, अशी विचारणा चार ते पाच जणांनी तेथील एकाला केली. यामुळे वाद वाढत जाऊन दोन्ही गट एकत्र जमले. दोन्ही गटांतील लोकांमध्ये हाणामारी होऊन दगडफेक करण्यात आली. यात समाज मंदिराचे मोठे नुकसान झाले. या प्रकाराची माहिती मिळताच पोलिस घटनास्थळी पोहोचले. त्यांनी वेळीच हस्तक्षेप केल्याने परिस्थिती नियंत्रणात आली. पोलिस शिपाई हंसराज कोळी यांच्या फिर्यादीवरून चोपड़ा शहर पोलिस ठाण्यात पंचशीलनगरातील सात, समतानगरातील चार आणि रामपुरा अपार्टमेंट येथील पाच, अशा २० ते २२ जणांविरुद्ध गुन्हा दाखल करण्यात आला आहे. यातील सात जणांना अटक करण्यात आली आहे. शहर पोलिस निरीक्षक के. के. पाटील यांच्या मार्गदर्शनाखाली पोहेकॉ संतोष पारधी पुढील तपास करीत आहेत. घटनास्थळी चोपडा उपविभागीय पोलिस अधिकारी कृषिकेश रावले यांनी भेट दिली.
