जळगाव मिरर | ५ ऑक्टोबर २०२३
राज्यातील महामार्गावर अपघाताची मालिका सातत्याने सुरु असतांना आज पुन्हा एकदा भीषण अपघाताची बातमी समोर आली आहे. नागपूर-हैदराबाद महामार्ग क्रमांक 44 वर हिंगणघाट येथील सगुणा कंपनीजवळ छोटी आर्वी शिवारात ट्रॅव्हल्स बसला भीषण अपघात झाला आहे. या अपघातात एका प्रवाशाचा मृत्यू झाला असून 8 प्रवासी जखमी झाले आहेत. बसचं मोठं नुकसान झालं आहे.
मिळालेल्या माहितीनुसार, नागपूर-हैदराबाद महामार्गावर खड्डा चुकवताना ट्रॅव्हल्स बस उलटली आहे. हैदराबादहून रायपूरला निघालेल्या बसला गुरुवारी पहाटे ५ वाजेच्या सुमारास अपघात झाला. ट्रॅव्हल्समधून 28 प्रवासी प्रवास करत होते. प्रवाशी साखरझोपेत असतानाचा हा अपघात झाला. यात एका प्रवाशाचा मृत्यू झाला तर 8 जण जखमी झाले आहेत.
