जळगाव मिरर | ६ ऑक्टोबर २०२३
जळगाव शहरातील एका २३ वर्षीय तरुणाने राहत्या घरात साडीने गळफास घेत आत्महत्या केल्याची घटना आज दि.६ ऑक्टोबर रोजी सकाळी उघडकीस आली आहे. या प्रकरणी शनिपेठ पोलीस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, श्र्हातील विठ्ठल पेठ भागातील गायवाडा परिसरातील रहिवासी विलास अत्तरदे यांचा मुलगा लोकेश विलास अत्तरदे (वय २३) असे मयत तरुणाचे नाव आहे. उत्तरप्रदेशातील लखनौ येथे वडील विलास अत्तरदे हे स्वयंपाकी कामासाठी गेलेले असतांना शुक्रवारी सकाळी लोकेशची आई शेतात गेली होती. त्यामुळे तो घरात एकटाच होता. त्या वेळी त्याने घरात साडीच्या सहाय्याने गळफास घेऊन आत्महत्या केली. लोकेश याचे शिक्षण झाल्यानंतर तो कंपनीत काम करीत होता. त्याची आई शेती काम करते, बहीणीचे लग्न झाले असून सकाळी ११ वाजेच्या सुमारास या तरुणाचा १० वर्षीय चुलत भाऊ घरात लोकेशकडे पाणी मागण्यासाठी गेला त्या वेळी त्याला तो गळफास घेतलेल्या अवस्थेत दिसला. त्याला पाहताच चिमुकल्याने शेजारच्या मंडळींना ही घटना सांगितली.
शेजारील काही तरुणांनी लोकेशला खाली उतरवून शासकीय वैद्यकीय महाविद्यालय व रुग्णालयात नेले. तेथे सीएमओ डॉ. आदित्य साळुंखे यांनी त्याला मयत घोषित केले. या घटनेविषयी नातेवाईकांनी लोकेशच्या वडिलांना माहिती दिली. ते लखनौ येथून आल्यानंतर शनिवारी मयताचे शवविच्छेदन करण्यात येणार आहे. लोकेशला एक बहीण असून तिचे लग्न झाले आहे. एकुलत्या एक मुलाने टोकाचा निर्णय घेत जीवन संपविल्याने अत्तरदे कुटुंबाला मोठा धक्का बसला आहे. याप्रकरणी शनिपेठ पोलीस स्टेशनला अकस्मात मृत्यूची नोंद करण्यात आली आहे.
