जळगाव मिरर | १८ डिसेंबर २०२३
देशभरात अनेक लोकांना नफा देण्याचे आमिष देत मोठ्या प्रमाणात लुटमार होण्याच्या घटना सातत्याने घडत असतांना नुकतेच डिजिटल करसीमध्ये गुंतवणूक केल्यास त्यावर नफा देण्याचे अमिष दाखवून संकेत जयराज बडगे (वय २५ ) यांची २ लाख ९६ हजार रुपयांमध्ये ऑनलाईन फसवणूक करण्यात आली. या प्रकरणी जळगाव सायबर पोलीस ठाण्यात शनिवारी १६ डिसेंबर रोजी रात्री ९ वाजता अज्ञात तीन जणांविरुद्ध सायबर पोलिस ठाण्यात गुन्हा दाखल करण्यात आला आहे.
मिळालेल्या माहितीनुसार, चाळीसगाव येथे खाजगी नोकरी करणारे संकेत बडगे यांच्या व्हॉटस अप क्रमांकावर तीन जणांनी संपर्क साधून डिजिटल करंसीमध्ये गुंतवणूक करण्यास सांगितले. यासाठी त्यांनी ३ नोव्हेंबर ते १६ डिसेंबर या दरम्यान वारंवार संपर्क साधून विश्वास संपादन केला व वेळोवेळी ऑनलाईन रक्कम स्वीकारली. दीड महिना होऊनही नफा मिळाला नाही.
नफा तर दूरच राहिला मुद्दल रक्कमही गेल्याने आपली फसवणूक झाल्याचे बडगे यांच्या लक्षात आले. त्यामुळे त्यांनी सायबर पोलिस ठाण्यात फिर्याद दिली. त्यावरून संपर्क साधणाऱ्या तीन जणांविरुद्ध जळगाव सायबर पोलीस ठाण्यात शनिवारी १६ डिसेंबर रोजी रात्री ९ वाजता गुन्हा दाखल करण्यात आला आहे. पुढील तपास पोलिस निरीक्षक किसन नजन पाटील करीत आहेत.
