जळगाव मिरर | २ जून २०२४
देशातील अनेक राज्यात अपघाताच्या मालिका सुरु असतांना एक भीषण अपघाताची घटना गुजरातच्या अरवलीमध्ये घडली आहे. अरवली जिल्ह्यात शनिवारी सकाळी झालेल्या बस अपघातात तिघांना आपला जीव गमवावा लागला तर ३० प्रवासी गंभीर जखमी झाले आहेत. दोन लक्झरी बसची समोरासमोर धडक झाल्याने हा अपघात झाला. ही धडक इतकी भीषण होती की तीन जण जागीच ठार झाले. हा सगळा प्रकार एका सीसीटीव्हीमध्ये कैद झाला असून त्यातील दृश्य हादरवणारी आहेत. घटनेची माहिती मिळताच स्थानिकांसह पोलिसांनी घटनास्थळी धाव घेऊन बचावकार्य सुरु केलं.
मिळालेल्या माहितीनुसार, गुजरातमधील अरवली जिल्ह्यातील मोडासा-मालपूर महामार्गावरुन यात्रेकरूंना घेऊन जाणाऱ्या खासगी बसला राज्य परिवहन बसची धडक बसली. या अपघातात तिघांचा मृत्यू झाला असून ३० हून अधिक जण जखमी झाले. साकरीया गावाजवळ राज्य महामार्गावर सकाळी ११ च्या सुमारास हा अपघात झाला. राज्य परिवहन मंडळाच्या बसने एका बाईकस्वाराला धडक दिली आणि चालकाचे नियंत्रण सुटले. त्यानंतर बस रस्ता दुभाजक ओलांडून महामार्गाच्या दुसच्या बाजूला उभ्या असलेल्या लक्झरी बसला धडकली.
ही भीषण घटना तिथल्या एका सीसीटीव्हीमध्ये कैद झाली. अपघाताची माहिती स्थानिक पोलिसांना देण्यात आली. अपघाताची माहिती मिळताच पोलिसांनीही घटनास्थळी धाव घेत बचावकार्य सुरू केले. मृतदेह शवविच्छेदनासाठी पाठवण्यात आले असून अपघातात जखमी झालेल्या सर्वांना रुग्णालयात दाखल करण्यात आलं आहे.
