जळगाव मिरर | ५ ऑक्टोबर २०२४
राज्यातील अनेक ठिकाणी अपघाताच्या घटना सातत्याने घडत असताना नुकतेच धुळे जिल्ह्यातील शिरपूर तालुक्यातील बोराडी ते मालकातर दरम्यान १० सप्टेंबर रोजी भरधाव वेगाने जाणारी कार आणि दुचाकी एकमेकांना धडकल्याने झालेल्या अपघातात तीन जण गंभीर जखमी झाले. उपचार सुरू असताना तिघांचाही मृत्यू झाला. याप्रकरणी शिरपूर तालुका पोलिस ठाण्यात बुधवारी गुन्हा दाखल झाला.
मिळालेल्या माहितीनुसार, शिरपूर तालुक्यातील बोराडी ते मालकातर रोडवर रामपुरा गावाच्या फाट्याजवळ १० सप्टेंबर रोजी दुपारी साडेतीनच्या सुमारास अपघाताची ही घटना घडली. एमएच ०४ ईएक्स ३६२५ क्रमांकाची कार आणि एमपी ४६ एमजे ६८४८ क्रमांकाची दुचाकी यांच्यात अपघात झाला. यात बाळू सखाराम पावरा (वय ४५, रा. लंगडीभवानी, ता. शहादा), दारासिंग तेरसिंग पावरा उर्फ जाधव (वय ५१, रा. चांदसिलिया ता. शहादा) आणि प्रताप रामजी पावरा (वय ६८, रा. लंगडीभवानी ता. शहादा) यांना गंभीर दुखापत झाली होती. तिघा जखमींवर उपचार सुरू असताना एका पाठोपाठ एक तिघांचाही मृत्यू झाला. याप्रकरणी कार चालकाविरोधात शिरपूर तालुका पोलिस ठाण्यात बुधवारी गुन्हा दाखल झाला.
