जळगाव मिरर | १३ मे २०२५
राज्यातील पुणे शहरात गेल्या काही महिन्यापासून गुन्हेगारी साम्राज्य वाढत चालले असतांना आता पुण्यात एका 18 वर्षीय तरुणीची भररस्त्यात धारदार शस्त्राने वार करत निर्घृण हत्या करण्यात आली आहे. या घटनेने एकच खळबळ उडाली आहे. कोमल जाधव असे मृत तरुणीचे नाव आहे. पिंपरी चिंचवड येथील वालेकरवाडी परिसरात रविवारी रात्री दोन अज्ञात व्यक्तींनी रस्त्यातच सपासप वार करत तिचा खून केला. दोन्ही आरोपींना पोलिसांनी अवघ्या काही तासांतच अटक केली आहे.
सविस्तर वृत्त असे कि, पिंपरी चिंचवड येथील वालेकरवाडी परिसरात कृष्णाईनगर येथे कोमल जाधव आपल्या परिवारासोबत राहत होती. रविवारी रात्री दुचाकीवरून आलेल्या अज्ञात दोन व्यक्तींनी तिच्यावर धारदार शस्त्राने वार करत कोमलची हत्या केली. सुरा आणि कोयतासारख्या शस्त्राने हा वार करण्यात आला असल्याचे समजते. प्राथमिक माहितीनुसार हे दोघेही दिल्लीचे रहिवासी असून ते कोमलच्या ओळखीचे होते.
रविवारी रात्रीच्या सुमारास कोमल ही आपल्या घरी होती. यावेळी दुचाकीवरून आलेल्या दोन आरोपींनी तिला घराबाहेर बोलावले. कोमल घराच्या बाहेर गेली तेव्हा या दोन्ही आरोपींनी कोमलवर धारदार शस्त्राने सपासप वार करण्यास सुरू केले. या हल्ल्यात तिचा मृत्यू झाला. पोलिसांना याबाबतची माहिती मिळताच घटनास्थळी दाखल झाले. त्यानंतर पोलिसांनी आरोपींचा शोध सुरू केला व काही तासांतच दोन्ही आरोपींच्या मुसक्या आवळल्या. पोलिस आता पुढील तपास करत असून ही हत्या का करण्यात आली याची चौकशी करत आहेत.
