जळगाव : प्रतिनिधी
खरी शिवसेना कोणाची यावर ठाकरे-शिंदे गटाचा वाद सुरू आहे. शिंदे गटात सहभागी झालेले आमदार गुलाबराव पाटील यांनी शिवसेना आमचीच असून धनुष्यबाण सुद्धा आमचाच असल्याचं वक्तव्य केलं होतं. दुसरीकडे शिंदे यांच्या गटात सहभागी मुक्ताईनगरचे अपक्ष आमदार चंद्रकांत पाटील यांनी शिवसेना ही आमचीच, असं सांगून उद्धव ठाकरे हे पक्षप्रमुख आहेत आम्ही शिवसेनेपासून वेगळे झालो नाही, शिवसेनेतच आहोत, असं वक्तव्य केलं आहे. यावरून आता शिंदे गटातील आमदारांचे धनुष्यबाण कुणाचा यावरून दुमत असल्याचे समोर आले आहे.
उद्धव ठाकरे आणि शिवसेनेतून फुटलेला एकनाथ शिंदे गट आपलीच खरी शिवसेना असल्याचे दावे करत आहेत. यावरून शिवसेना वाद पाहायला मिळत आहे. अशातच शिंदे गटातील आमदार गुलाबराव पाटील ह्यांनी कालच मोठा दावा केला होता. विधिमंडळात बहुमत असल्याने खरी शिवसेना आमचीच आहे. धनुष्यबाण चिन्हासाठी पुढील लढाई न्यायालयात असेल, असं वक्तव्य गुलाबराव पाटील यांनी केलंय. यावर आता बंडखोर आमदार चंद्रकांत पाटील यांनी प्रतिक्रिया दिली आहे. शिवसेना आमचीच आहे. उद्धव साहेबांचीच शिवसेना आहे, बाळासाहेबांचीच शिवसेना आहे. फक्त आमच्यात जो असंतोष होता घटक पक्षांबाबत तो आम्ही स्पष्ट केलेला आहे. धनुष्यबाणाच्या चिन्हाची लढाई, तर वरिष्ठ स्तरावर जो निर्णय होईल, तो आम्हाला मान्य असेल, असं वक्तव्य चंद्रकांत पाटील यांनी केलं आहे. यामुळे शिंदे गटातील आमदारांमध्येच एक वाक्यता नसल्याची चर्चा आहे. आता एकनाथ शिंदे गटातील सहभागी आमदारांची शिवसेना कोणाची यावरून वेगवेगळे मत असल्याने आगामी काळात यावरून काय राजकीय घडामोडी घडतात? हे पाहणं महत्त्वाचं ठरणार आहे.
