जळगाव मिरर | ३० एप्रिल २०२६
चाळीसगाव शहरात सोशल मीडियाच्या माध्यमातून दहशत निर्माण करण्याचा प्रयत्न करणाऱ्या एका सराईत गुन्हेगाराला पोलिसांनी अटक केल्याची धक्कादायक घटना समोर आली आहे. हातात खोटे पिस्तूल (एअर गन/नकली शस्त्र) घेऊन फोटो व व्हिडीओ पोस्ट करून नागरिकांमध्ये भीती निर्माण करण्याचा प्रयत्न केल्याने शहरात एकच खळबळ उडाली होती.
मिळालेल्या माहितीनुसार, चाळीसगाव शहर पोलीस स्टेशन हद्दीतील रेकॉर्डवरील आरोपी चेतन गोल्हार याने आपल्या सोशल मीडिया अकाउंटवर पिस्तूल हातात घेतलेले फोटो आणि व्हिडीओ प्रसारित केले होते. या पोस्टमुळे नागरिकांमध्ये भीतीचे वातावरण निर्माण झाले असून, ही माहिती वाऱ्यासारखी संपूर्ण शहरात पसरली. परिणामी, परिसरात चर्चेला उधाण आले होते.
या प्रकाराची गांभीर्याने दखल घेत चाळीसगाव शहर पोलिसांनी तत्काळ कारवाई सुरू केली. पोलीस निरीक्षक अमितकुमार मनेळ यांच्या मार्गदर्शनाखाली विशेष पथक तयार करण्यात आले. तांत्रिक विश्लेषण आणि गुप्त माहितीच्या आधारे पोलिसांनी आरोपीचा माग काढला. मंगळवारी रात्री उशिरा पोलिसांनी संशयित चेतन गोल्हार याला ताब्यात घेतले. चौकशीत त्याच्याकडून गुन्ह्यात वापरलेले नकली पिस्तूल जप्त करण्यात आले आहे. प्राथमिक तपासात आरोपीने सोशल मीडियावर प्रसिद्धीसाठी आणि दहशत निर्माण करण्याच्या उद्देशाने ही कृत्ये केल्याचे समोर आले आहे.
या प्रकरणी आरोपीविरुद्ध महाराष्ट्र पोलीस कायद्याच्या कलम ११२ आणि ११७ अंतर्गत गुन्हा दाखल करण्यात आला असून पुढील तपास सुरू आहे.
