जळगाव मिरर | ३ मे २०२६
शहरातील खोटे नगर परिसरात निर्जनस्थळी नेऊन नंदुरबार जिल्ह्यातील २६ वर्षीय तरुणीवर जळगावातील भागवत गोविंदा चव्हाण (रा. वाघनगर) याने अत्याचाराचा प्रयत्न केला. तरुणीने विरोध केला असता तिला जबर मारहाण करून तिचा मोबाईल व कागदपत्रे लांबविले. ही घटना दि. १० एप्रिल रोजी घडली. या प्रकरणी नंदुरबार येथे गुन्हा दाखल होऊन तो जळगाव तालुका पोलिस ठाण्यात दि. ३० एप्रिल रोजी वर्ग करण्यात आला आहे.
मिळालेल्या माहितीनुसार, नंदुरबार जिल्ह्यातील एक २६ वर्षीय तरुणी खासगी नोकरी करून जळगावात राहते. तिची भागवत चव्हाण याच्यासोबत ओळख झाली. त्यानंतर ओळखीचा फायदा घेत दि. १० एप्रिल रोजी रात्री त्याने सदर तरुणीला खोटेनगर परिसरातील निर्जनस्थळी असलेल्या काटेरी झुडपात नेले. त्याठिकाणी तरुणीसोबत अश्लील वर्तन करीत तिच्यावर अत्याचार करण्याचा प्रयत्न केला. तरुणीने विरोध केल्यामुळे संशयिताने तिला लाथाबुक्क्यांनी पोटावर, पाठीवर, डोळ्यावर, गालावर मारहाण करुन गंभीर जखमी केले. त्यानंतर पीडितेजवळ असलेला मोबाईल आणि तिचे शैक्षणिक कागदपत्रे घेवून तो पसार झाला. या प्रकरणी पीडितेने नंदुरबार पोलिस ठाण्यात फिर्याद दिली. त्यावरून गुन्हा दाखल झाला व जळगाव तालुका पोलिस ठाण्यात वर्ग करण्यात आला. पुढील तपास उपनिरीक्षक विजय पाटील करीत आहेत.
