जळगाव मिरर | ३ मे २०२६
भुसावळ येथील बाजारपेठ परिसरात संशयास्पदरित्या वावरणाऱ्या एका १९ वर्षीय तरुणास पोलिसांनी अटक करून त्याच्याकडून दोन गावठी पिस्तुले (कट्टे) आणि एक धारदार गुप्ती जप्त केली. ही कारवाई भुसावळ बाजारपेठ पोलिस ठाण्याच्या डीबी पथकाने शुक्रवारी रात्री केली.
पोलिसांना आलिशान वॉटर पार्कच्या मागील मोकळ्या जागेत एक तरुण शस्त्र बाळगून फिरत असल्याची गोपनीय माहिती मिळाली होती. त्यानुसार पथकाने सापळा रचला असता संशयिताने पोलिसांना पाहून पळ काढण्याचा प्रयत्न केला. मात्र पोलिसांनी त्याला तत्काळ ताब्यात घेतले. अटक केलेल्या तरुणाचे नाव भूषण शांताराम कोळी (वय १९, रा. पाडळसा, ता. यावल) असे आहे. त्याची झडती घेतली असता अंदाजे ५० हजारांचे दोन गावठी कट्टे, एक हजार रुपयांची गुप्ती तसेच २० हजारांचा आयफोन जप्त करण्यात आला. या प्रकरणी कॉन्स्टेबल भूषण चौधरी यांच्या फिर्यादीवरून गुन्हा दाखल करण्यात आला आहे.
आरोपीला न्यायालयाने न्यायालयीन कोठडी सुनावली आहे. दरम्यान, आरोपीने शस्त्रे कुठून मिळवली, शहरात ती आणण्यामागचा उद्देश काय होता, तसेच त्याची पार्श्वभूमी काय आहे, याचा तपास सुरू असल्याची माहिती पोलिसांनी दिली आहे. शहरात तरुणांकडे वारंवार गावठी शस्त्रे आढळत असल्याने चिंतेचे वातावरण निर्माण झाले असून यामागील साखळीचा शोध घेण्याचे काम सुरू आहे.
