जळगाव मिरर | ११ मे २०२६
ठेकेदाराला बिलाची रक्कम अदा करण्याच्या मोबदल्यात पाच लाख रुपयांची लाच स्वीकारणारे सार्वजनिक बांधकाम विभागातील शाखा अभियंता (वर्ग २) योगेश अभिमन्यू अहिरे (४४) यांना दोन दिवसांची पोलिस कोठडी सुनावण्यात आली. दरम्यान, वरिष्ठ अधिकारी व नगरसेविका पुत्राचा या लाचेशी काय संबंध याचीही माहिती लाचलुचपत प्रतिबंधक विभागाकडून घेतली जाणार आहे.
लाच मागणी पडताळणीवेळी तक्रारदार यांना नगरसेविका पुत्र यांना एकूण रकमेच्या ६ टक्के प्रमाणे पैसे देण्याविषयी सांगितले होते. त्यामुळे त्यांचा शोध घेवून या प्रकरणाशी नेमका काय संबंध आहे, याचीदेखील एसीबीकडून माहिती घेतली जाणार आहे. लाच घेतल्यानंतर योगेश अहिरे यांचे कार्यालय सील करण्यात आले असून त्यांच्या उपस्थितीत कार्यालयाची झडती घेतली जाणार आहे.
योगेश अहिरे यांनी अपसंपदा जमविल्याची शक्यता आहे. त्याविषयीदेखील शोध घेतला जाणार असून त्यांनी केलेल्या आर्थिक गुंतवणुकीचीही माहिती घेतली जाणार आहे. डीवायएसपी योगेश ठाकूर यांनी अहिरे यांना न्यायालयात हजर केले असता दोन दिवसांची पोलिस कोठडी सुनावण्यात आली. सरकारपक्षातर्फे जिल्हा सरकारी वकील अॅड. सुरेंद्र काबरा यांनी काम पाहिले.
