जळगाव मिरर | १० जुलै २०२६
महाराष्ट्र शासनाने प्रतिबंधित केलेल्या गुटखा, सुगंधित पानमसाला आणि सुगंधित तंबाखूची अवैध वाहतूक करणाऱ्यांविरोधात चाळीसगाव शहर पोलिसांनी धडक कारवाई करत पाच संशयितांना अटक केली आहे. या कारवाईत प्रतिबंधित गुटख्यासह कार असा एकूण ६ लाख ५७ हजार ७०७ रुपयांचा मुद्देमाल जप्त करण्यात आला असून, या कारवाईमुळे गुटखा तस्करांचे धाबे दणाणले आहेत.
जळगाव जिल्हा पोलीस अधीक्षक श्रीकांत धिवरे यांच्या मार्गदर्शनाखाली जिल्ह्यात अवैध धंद्यांविरोधात विशेष मोहीम सुरू आहे. त्याच अनुषंगाने चाळीसगाव शहर पोलीस ठाण्याचे प्रभारी अधिकारी अमितकुमार मनेळ यांना प्रतिबंधित गुटख्याची मोठी खेप शहरात येणार असल्याची गोपनीय माहिती मिळाली. माहितीची खातरजमा करून पोलिसांनी तातडीने विशेष पथक तयार केले आणि संशयित वाहनावर सापळा रचून कारवाई केली.
या कारवाईदरम्यान अजित चांदमल रावलानी, कुबेर शेख कसम, हितेश किशोर पवार, निखिल राजेंद्र कंसवाणी आणि सोहम संजय शिंगणे या पाच संशयितांना ताब्यात घेण्यात आले. त्यांच्या ताब्यातील कारची तपासणी केली असता मोठ्या प्रमाणात शासनाने प्रतिबंधित केलेला गुटखा, सुगंधित पानमसाला आणि सुगंधित तंबाखूचा साठा आढळून आला.
घटनेची माहिती मिळताच अन्न व औषध प्रशासन विभागाच्या अधिकाऱ्यांना घटनास्थळी पाचारण करण्यात आले. त्यांच्या उपस्थितीत पंचनामा करून संपूर्ण मुद्देमाल जप्त करण्यात आला. त्यानंतर चाळीसगाव शहर पोलीस ठाण्यात संबंधित कायद्यांनुसार गुन्हा दाखल करण्यात आला असून, पुढील तपास सुरू आहे.
प्राथमिक चौकशीत हा प्रतिबंधित माल मध्य प्रदेशातील बऱ्हाणपूर येथून तस्करी करून चाळीसगावात आणण्यात आल्याचे निष्पन्न झाले आहे. या रॅकेटमध्ये आणखी कोणाचा सहभाग आहे, मालाचा पुरवठादार कोण आहे आणि तो जिल्ह्यात कुठे वितरित केला जाणार होता, याचा पोलीस कसून तपास करीत आहेत.
दरम्यान, जिल्ह्यात प्रतिबंधित गुटख्याची विक्री आणि वाहतूक रोखण्यासाठी पोलीस प्रशासनाने कारवाईची मोहीम अधिक तीव्र केली असून, नागरिकांनी अशा अवैध व्यवसायाची माहिती तातडीने पोलिसांना देऊन सहकार्य करावे, असे आवाहन करण्यात आले आहे.
