जळगाव मिरर | १५ नोव्हेंबर २०२६
विद्युत मीटर तपासणीनंतर वीज उपकरणाचा भार अधिक असल्याने वीज चोरीची कारवाई टाळण्यासाठी १५ हजार रुपयांची लाच घेताना महावितरणचे सहाय्यक अभियंता विशाल वसंत नेमाडे (३७, रा. योगेश्वर नगर) यांच्यासह दोन वरिष्ठ तंत्रज्ञांना लाच लुचपत प्रतिबंधक विभागाच्या पथकाने ताब्यात घेतले. ही कारवाई शनिवार दि.१४ नोव्हेंबर रोजी करण्यात आली.
मिळालेल्या माहितीनुसार, एमआयडीसी पोलिस ठाण्याच्या हद्दीतील एका परिसरात तक्रारदाराच्या घरी महावितरणच्या महसूल व देय उपविभागाचे सहाय्यक अभियंता विशाल नेमाडे, वरिष्ठ तंत्रज्ञ भरत कडू तायडे (४५, रा. कोल्हे हिल्स परिसर), रवींद्र छन्नू पाटील (४१, रा. पंडित कॉर्नर अपार्टमेंट) हे वीज मीटर तपासणीसाठी गेले होते. तेथे बसविलेल्या नवीन वीज मीटरची तपासणी करून वीज मीटरचे व घरातील उपकरणाचे फोटो काढले. त्यानंतर भरत तायडे याने तक्रारदारास फोन करून बोलविले व तुमच्याकडे अधिक भार असल्याने वीज चोरीची कारवाई टाळण्यासाठी सहाय्यक अभियंत्याच्या नावाने ४० हजार रुपयांची लाच मागितली. तडजोडीअंती १५ हजार रुपयांची लाच घेण्यास संमती दर्शविली. याविषयी तक्रारदाराने लाचलुचपत प्रतिबंधक विभाग कडे तक्रार केली. त्यानंतर सहाय्यक अभियंता विशाल नेमाडे यांना १५ हजार रुपयांची लाज घेताना पथकाने रंगेहात पकडले. या प्रकरणी एमआयडीसी पोलिस ठाण्यात गुन्हा दाखल करण्याचे काम सुरू होते.
