जळगाव मिरर । २६ सप्टेंबर २०२३
राज्यात गणेशोस्तवाची धामधूम सुरु असताना एक धक्कादायक बातमी पुण्यातुन समोर आली आहे. अंबिलओढा कॉलनी परिसरातील साने गुरुजी तरुण मंडळाच्या गणेश देखाव्याच्या कळसाला आग लागल्याचं वृत्त समोर आले आहे. अचानक घडलेल्या या घटनेमुळं एकच खळबळ उडाली. आगीचं कारण अद्याप समजू शकलेलं नाही. यावेळी भाजपाचे राष्ट्रीय अध्यक्ष जेपी नड्डा यांच्या हस्ते आरती सुरु असताना हा प्रकार घडल्याची माहिती सुत्रांकडून मिळते आहे.
#WATCH | Pune, Maharashtra: Sane Guruji Tarun Mitra Mandal catches fire.
Details awaited. pic.twitter.com/N27zSpLi7Q
— ANI (@ANI) September 26, 2023
मिळालेल्या माहितीनुसार, पुण्यातील अंबिलओढा कॉलनी परिसरातील साने गुरुजी तरुण मंडळ हे भाजपचे शहराध्यक्ष धीरज घाटे यांचं मंडळ असून यंदा या मंडळानं उज्जैन येथील महाकाल मंदिराचा भव्य देखावा उभारला आहे. भाजपचे राष्ट्रीय अध्यक्ष जेपी नड्डा हे आज पुण्याच्या दौऱ्यावर आहेत. त्यांच्या हस्ते इथल्या गणेशाच्या आरतीचं नियोजन करण्यात आलं होतं. त्यानुसार आरती सुरु असतानाच अचानक मंगळवारी संध्याकाळी हा आगीचा प्रकार घडला. पुढील गोंधळ टाळण्यासाठी नड्डा यांना आरती अर्धवट सोडून मंडपातून बाहेर पडावं लागलं. पाऊस सुरू झाल्यामुळं आग काही मिनिटांत विझली. मात्र, ती नेमकी कशामुळं लागली याचं कारण अद्याप समजू शकलेलं नाही. अग्निशमन दलाच्या दोन गाड्या आणि एक वाॅटर टँकर ही आग विझवण्यासाठी घटनास्थळी दाखल झाले. या दुर्घटनेत देखाव्याचं नुकसानं झालं पण कुणीही जखमी झालेलं नाही.
