जळगाव मिरर | ११ मार्च २०२५
जगभरात आपल्या अभिनयाने प्रेक्षकांची मने जिंकलेल्या अभिनेता हृतिक रोशनबाबत एक मोठी बातमी समोर आली आहे. सोमवारी ‘वॉर २’ चित्रपटाच्या शूटिंग दरम्यान हृतिक रोशन जखमी झाला. गाण्याच्या चित्रीकरणादरम्यान अभिनेत्याच्या पायाला दुखापत झाली. त्यामुळे शूटिंग पुढे ढकलण्यात आले आहे.
अभिनेत्याच्या पायाला खोल दुखापत झाली आहे. सध्या डॉक्टरांनी हृतिकला चार आठवडे विश्रांती घेण्याचा सल्ला दिला आहे. हे एक उच्च ऊर्जा देणारे गाणे असल्याचे म्हटले जात आहे. हृतिक दाक्षिणात्य अभिनेता ज्युनियर एनटीआर सोबत या गाण्याचे चित्रीकरण करत होता. आता, हे गाणे मे महिन्यात चित्रित केले जाईल.
मिळालेल्या माहितीनुसार, अभिनेता त्याच्या घरी नृत्याची तालीम करत होता. त्यावेळी त्याच्या गुडघ्याला दुखापत झाली. हृतिकच्या एका जवळच्या मित्राचे म्हणणे आहे की, डॉक्टरांनी त्याला घरी तपासले आहे आणि पंधरा दिवस विश्रांती घेण्यास सांगितले आहे. वृत्तांवर विश्वास ठेवला तर, उर्वरित कलाकारांनी त्यांच्या भागांचे चित्रीकरण पूर्ण केले आहे. चित्रपट पोस्ट प्रॉडक्शनसाठी तयार आहे. हा चित्रपट १४ ऑगस्ट २०२५ रोजी जगभरात प्रदर्शित होईल असे म्हटले जात आहे.
‘वॉर-२’ हा चित्रपट अयान मुखर्जी दिग्दर्शित करत आहे. आदित्य चोप्राच्या YRF स्पाय युनिव्हर्समधील हा पुढचा सीक्वेन्स आहे. या चित्रपटात हृतिक रोशन आणि ज्युनियर एनटीआर व्यतिरिक्त कियारा अडवाणी देखील दिसणार आहेत. या चित्रपटात हृतिक रोशन ‘वॉर’ चित्रपटातील त्याच्या मेजर कबीर धालीवाल या व्यक्तिरेखेची भूमिका साकारणार आहे. हा चित्रपट २०१९ च्या अ‍ॅक्शन थ्रिलर चित्रपट ‘वॉर २’ चा सिक्वेल आहे. याचा पहिला भाग सिद्धार्थ आनंद यांनी दिग्दर्शित केला होता.
