जळगाव मिरर | २४ ऑगस्ट २०२३
जगभरात सोशल मिडीयावर अनेक व्हिडीओ व्हायरल होत असतात अशाच व्हिडीओचे काही लोक अनुकरन करून जीव देखील धोक्यात घालत असतात. अशीच एक धक्कादायक घटना तामिळनाडूत घडली आहे. एका तरुणाने चक्क युट्यूबवर टेक्निक पाहून पती त्याच्या पत्नीची घरीच डिलीव्हरी करत होता यानंतर प्रसूतीदरम्यान त्या महिलेचा दुर्देवी मृत्यू झाल्याची घटना २२ ऑगस्ट रोजी कृष्णगिरी जिल्ह्यात ही घटना घडली.
प्राथमिक आरोग्य केंद्राच्या वैद्यकीय अधिकाऱ्यांनी दिलेल्या माहितीनुसार, तामिळनाडूमधील पुलियामपट्टी येथील रहिवासी असलेल्या लोगनायकी (वय 27) नावाच्या महिलेचा मृत्यू झाला असून याप्रकरणी पोलिसात तक्रार दाखल करण्यात आली आहे. पोलीस सूत्रांनी दिलेल्या माहितीनुसार, लोगनायकी यांना लेबर पेन सुरू झाल्यानंतर त्यांचा पती मधेश यांनी घरीच त्यांची नैसर्गिक डिलीव्हरी करण्याचा प्रयत्न केला. थोड्या वेळाने त्यांनी एका मुलाला तर जन्म दिला. पण त्यावेळी कथितरित्या गर्भाशी जोडलेली नाळ नीट कापली गेली नाही, आणि जास्त रक्तस्त्राव होऊन लोगनायकी ही बेशुद्ध झाली.
ती बेशुद्ध झाल्याचे पाहून तिला तातडीने प्राथमिक आरोग्य केंद्रात उपचारांसाठी आणण्यात आले खरे पण तेथे तिला मृत घोषित करण्यात आले. पोलिसांनी सीआरपीसी कलम १७४ (अनैसर्गिक मृत्यू) अंतर्गत एफआयआर नोंदवला आहे. मृत महिलेच्या पतीने यूट्यूब पाहून तिची डिलीव्हरी करण्याचा प्रयत्न केल्याचे प्राथमिक तपासात समोर आले आहे. मात्र याप्रकरणी अद्याप अधिक तपास सुरू असून, तो पूर्ण झाल्यानंतरच स्थिती स्पष्ट होऊ शकते. या तपासात पतीविरोधात पुरावे मिळाल्यास पोलिस त्याला अटक करू शकतात. मृत महिलेच्या पतीने यूट्यूब पाहून घरी डिलीव्हरी कशी करायाची याची माहिती गोळा केली होती असे समोर आले आहे. मात्र त्याच्या अर्धवट ज्ञानामुळे डिलीव्हरीनंतर अति रक्तस्त्रावामुळे त्याच्या पत्नीला जीव गमवावा लागला.
