जळगाव मिरर | १ मार्च २०२६
जळगाव महापालिका निवडणुकीत लाभ मिळवण्यासाठी तसेच शासकीय कामात सोयीसाठी बनावट जन्मदाखले सादर केल्याचा खळबळजनक आरोप समोर आला आहे. नगरसेवक जाकीर खान रसूल खान यांच्यावर बनावट कागदपत्रे तयार करून प्रशासनाची दिशाभूल केल्याचा आरोप माजी उपमहापौर तथा प्रतिस्पर्धी उमेदवार कुलभूषण पाटील यांनी केला आहे. गुरुवारी त्यांनी जळगाव महानगरपालिका आयुक्त तसेच शहर पोलिस ठाण्यात लेखी तक्रार दाखल केली.
तक्रारीनुसार, २०२६ च्या महापालिका निवडणुकीत प्रभाग क्रमांक १० ‘ड’ मधून जाकीर खान रसूल खान यांनी उमेदवारी अर्ज दाखल केला होता. प्रतिज्ञापत्रात त्यांनी स्वतःला तीन अपत्ये असल्याचे नमूद केले होते. मात्र, माहिती अधिकारातून महापालिकेच्या जन्म-मृत्यू विभागाकडून मिळालेल्या कागदपत्रांनुसार त्यांना पाच अपत्ये असल्याचे आढळून आल्याचा दावा पाटील यांनी केला आहे.
यातील सर्वात धक्कादायक बाब म्हणजे दोन मुलींच्या जन्मातील केवळ १५ दिवसांचे अंतर असल्याचे नोंदीत दिसून येते. महापालिकेच्या दाखल्यांनुसार पहिल्या अपत्याचा जन्मदिनांक २ सप्टेंबर २००० (नोंदणी दिनांक १३ सप्टेंबर २०००) असा आहे; तर दुसऱ्या अपत्याचा जन्मदिनांक १७ सप्टेंबर २००० दर्शविण्यात आला असून त्याची नोंदणी दिनांक १४ ऑगस्ट २००७ अशी आहे. या विसंगतीमुळे जन्मदाखल्यांमध्ये फेरफार केल्याचा संशय व्यक्त करण्यात आला आहे.
तक्रारदार कुलभूषण पाटील यांनी निवडणुकीदरम्यान अपत्यांची खरी संख्या लपवून खोटी माहिती दिल्याचा तसेच महापालिकेच्या जन्म-मृत्यू विभागाची दिशाभूल करून बनावट दाखले मिळवल्याचा आरोप केला आहे. या प्रकरणाची सखोल चौकशी करून संबंधितांविरुद्ध फसवणुकीचा गुन्हा दाखल करण्याची मागणी त्यांनी केली आहे.
दरम्यान, तक्रारीची दखल घेत महापालिका प्रशासनाने प्राथमिक पडताळणी सुरू केली असून नोंदींची तपासणी केली जात आहे. चौकशीत तथ्य आढळल्यास मनपा स्वतः फसवणूक झाल्याची तक्रार दाखल करेल, असे सूत्रांनी सांगितले. महिनाभरात कारवाई न झाल्यास तक्रारदार पाटील स्वतः पोलिसांत गुन्हा दाखल करण्याचा इशारा दिला आहे. या आरोपांमुळे जळगावच्या राजकीय वर्तुळात खळबळ उडाली असून येत्या काळात या प्रकरणाला वेग येण्याची शक्यता आहे.
