जळगाव मिरर | १६ फेब्रुवारी २०२५
अमळनेर येथे गांजा विक्रीला आणणाऱ्या शिरपूर येथील एकाला रंगेहाथ पकडून त्याच्याजवळून गांजा व रिक्षासह २ लाख ८० हजाराचा मुद्देमाल जप्त करण्यात आला आहे. एलसीबीसह अमळनेरच्या स्थानिक पोलिसांनी १४ रोजी रात्री साडेनऊ वाजता ही संयुक्त कारवाई करून आरोपीला अटक केली आहे.
मिळालेल्या माहितीनुसार, पिवळ्या रंगांची रिक्षा (एमएच १८, एजे- ३७९२) मधून गांजा विक्रीसाठी आणला जात असल्याची माहिती एलसीबी पोलिसांना मिळताच त्यांनी पारोळ्याचे पोलीस निरीक्षक सुनील पवार यांना ही माहिती दिली. पो.नि. पवार यांनी सहाय्यक पोलीस निरीक्षक रवींद्र पिंगळे, नायब तहसीलदार प्रशांत धमके, पोलीस उपनिरीक्षक नामदेव बोरकर, एलसीबीचे पोलिस उपनिरीक्षक गणेश वाघमारे रवींद्र पाटील, दीपक माळी यांच्यासह जितेंद्र निकुंभे, सुनील महाजन, अमोल पाटील, विनोद संदानशिव यांना छापा टाकण्यासाठी पाठवले. सर्व पथकाने चोपडा रस्त्यावर आसाराम बापू आश्रमाच्या बाजूला रस्त्यावर सापळा लावला. रात्री ९.२५ वाजता चोपड्याकडून पिवळ्या रंगाची रिक्षा येतात तिची झडती घेण्यात आली. या वेळी रिक्षा चालकाने त्याचे नाव कोमलसिंग विकास राजपुत (वय २९, रा. भोरखेडा, ता. शिरपूर) असे सांगितले. त्याच्याजवळील रिक्षामधील गोणीत १ लाख ८० हजाराचा १८ किलो ३२८ ग्रॅम गांजा आढळला.
कोमलसिंग याला गांजा आणि १ लाखांची रिक्षा असा एकूण २ लाख ८० हजारांच्या मुद्देमालसह अटक करण्यात आली. रवींद्र पाटील यांच्या फिर्यादीवरून अमळनेर पोलीस ठाण्यात विविध कलमान्वये त्याच्यावर गुन्हा दाखल करण्यात आला आहे. तपास पोलीस उपनिरीक्षक नामदेव बोरकर करत आहेत.
