जळगाव मिरर | ४ डिसेंबर २०२४
जुन्या वादातून एका महिलेच्या घरात प्रवेश करुन त्यांना शिवीगाळ करीत मारहाण केली. तसेच स्टीलचा दांडा डोक्यात टाकून गंभीर दुखापत केली. ही घटना गुरूवार दि. २८ नोव्हेंबर रोजी मध्यरात्री ३ वाजेच्या सुमारास पिंप्राळा हुडको परिसरातील घडली. याप्रकरणी सोमवारी रामानंदनगर पोलीस ठाण्यात चार जणांविरोधात गुन्हा दाखल करण्यात आला आहे.
मिळालेल्या माहितीनुसार, शहरातील पिंप्राळा हुडको परिसरात मेहरून्नीसा शेख कय्युब (वय ३२) ही महिला आपल्या परिवारासह वास्तव्याला आहे. गुरूवार दि. २८ नोव्हेंबर रोजी मध्यरात्री महिला ही घरात झोपलेली असतांना जुन्या वादातून संशयित नूर मोहंमद, फरीद पटेल, अंजूमबी फिरोज खान, अहमद नुर (सर्व रा. पिंप्राळा हुडको) यांनी अनधिकृतपणे घरात प्रवेश करत महिलेला शिवीगाळ करत डोक्यात स्टिलचा दांडा टाकून गंभीर दुखापत केली. ही घटना घडल्यानंतर महिलेला जिल्हा शासकीय वैद्यकीय महाविद्यालयात दाखल करण्यात आले. रूग्णालयात उपचार घेतल्यानंतर सोमवार दि.२ डिसेंबर रोजी रात्री ९.३० वाजता त्यांनी रामानंद नगर पोलीस ठाण्यात तक्रार दिली. त्यानुसार चौघांविरुद्ध गुन्हा दाखल करण्यात आला. पुढील तपास पोहेकॉ चंद्रकांत पाटील हे करीत आहे.
