पैठण : वृत्तसंस्था
पैठणहून पाचोड येथे घरी जात असतांना दुचाकीच्या अपघातात बापलेक उपचारादरम्यान मृत्यू झाल्याची दुदैवी घटना घडल्याने पाचोड परिसरात हळहळ व्यक्त केली जात आहे.
सविस्तर वृत्त असे की, मुलीला शाळेत प्रवेश घेण्यासाठी आधार कार्ड बनवून घराकडे जाणाऱ्या मुलीला व वडिलांचा दुचाकीच्या अपघातात जागीच मृत्यू झाला आहे. या अपघातात सतीश शिवाजी शिंदे आणि गायत्री सतीश शिंदे (वय १०) अशी मृत्यूमुखी पडलेल्यांची नावे आहेत. गायत्री शिंदे हिला पैठण तालुक्यातील खेर्डा येथील जिल्हा परिषद प्राथमिक शाळेत तिसरी वर्गात शिक्षण घेत होती. शिक्षकांनी तिला आधार कार्ड नोंदणी करून आणण्याचे सांगितले होते. सोमवारी (दि.२२) दुपारी पैठण येथे ती आधार नोंदणी करण्यासाठी वडिलांससोबत गेली होती. घरी परतताना पैठण पाचोड रस्त्यावर मोटरसायकलचा अपघात झाला. या अपघातात गायत्रीचा जागीच मृत्यू झाला होता. तर जखमी झालेल्या सतीश शिंदे यांच्यावर औरंगाबाद येथील रुग्णालयात उपचार सुरू होते. दरम्यान, त्यांचा सोमवारी रात्री उपचारदरम्यान मृत्यू झाला. त्यांच्यावर आज (मंगळवारी) खेर्डा येथे अंत्यसंस्कार करण्यात आले. अपघातात बापलेकीचा दुर्दैवी मृत्यू झाल्याने पंचक्रोशीत हळहळ व्यक्त होत आहे. तपास पोलीस निरीक्षक किशोर पवार यांच्या मार्गदर्शनाखाली पोलीस उपनिरीक्षक दशरथ बुरकूल करत आहेत.
