जळगाव मिरर | १० डिसेंबर २०२३
जळगाव शहरातील एका कंपनीसमोर रिक्षा घेऊन उभे असताना, गोपाल एकनाथ शिंदे (३७, रा. मुकळी फाटा, ता. धरणगाव) यांना मारहाण करून, त्यांच्या खिशातील पाकिटामधील ३,५०० रुपये व महत्त्वाचे कागदपत्र दोन जणांनी चोरून नेले. ही घटना ८ डिसेंबर रोजी औद्योगिक वसाहत परिसरात घडली. एमआयडीसी पोलिस ठाण्यात गुन्हा दाखल करण्यात आला आहे.
मिळालेल्या माहितीनुसार, औद्योगिक वसाहत परिसरातील एका कंपनीसमोर रिक्षाचालक गोपाल शिंदे हे उभे असताना तेथे दुचाकीवर दोन जण आले व त्यांनी शिंदे यांना मारहाण करण्यास सुरुवात केली. त्यांच्या पँटच्या खिशातील पाकिटामधून ३,५०० रुपये, आधार कार्ड, आरसी बुक, वाहन परवाना काढून घेतला व रिक्षाचालकाला ढकलून देत पळून गेले. शिंदे यांनी एमआयडीसी पोलिस ठाण्यात फिर्याद दिली. २५ ते ३० वर्षे वयोगटांतील दोन अनोळखींविरुद्ध गुन्हा दाखल करण्यात आला आहे.
