जळगाव मिरर | २६ मार्च २०२६
भुसावळ येथील आगाखान वाड परिसरात उसने दिलेल्या पैशांच्या वादातून दोन गटांमध्ये भीषण हाणामारी झाल्याची घटना समोर आली आहे. या घटनेत एकाच कुटुंबातील तिघेजण गंभीर जखमी झाले असून, या प्रकरणी भुसावळ बाजारपेठ पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, शाहरुख शेख हसिक उर्फ मुन्ना (वय २८) यांनी जमिना रऊफ कुरेशी हिच्याकडून सुमारे ४ हजार रुपये उसने घेतले होते. काही दिवसांनी संबंधितांनी पैसे परत मागितले असता, शाहरुख यांनी पैसे परत केल्याचे सांगितले. यावरून दोन्ही बाजूंमध्ये वाद निर्माण झाला.
वाद वाढत गेल्याने संशयित रहिम रऊफ कुरेशी व जमिना रऊफ कुरेशी यांनी शाहरुख यांच्या घरासमोर येऊन शिवीगाळ केली. त्यानंतर शाब्दिक वादाचे रूपांतर हाणामारीत झाले. या दरम्यान जमिना कुरेशी हिने लोखंडी पाइपने शाहरुख यांच्या पत्नी फरहीन हिच्यावर हल्ला केला. तसेच रहिम कुरेशी याने लोखंडी वस्तूने मारहाण करत जीवेठार मारण्याची धमकी दिली.
या हल्ल्यात शाहरुख शेख, त्यांची पत्नी फरहीन तसेच वडील हसिद उर्फ मुन्ना हे गंभीर जखमी झाले. तसेच भांडण सोडवण्यासाठी आलेल्या मोहसिन शेख यांनाही मारहाण करण्यात आली. या प्रकरणी भुसावळ बाजारपेठ पोलीस ठाण्यात दोन्ही संशयितांविरुद्ध गुन्हा दाखल करण्यात आला असून, पुढील तपास पोलीस हेड कॉन्स्टेबल तेजस पारिसकर करीत आहेत.
