चाळीसगाव : प्रतिनिधी
शहरातील कोदगाव रस्त्यावर असलेल्या महादू सखाराम अहिरे यांच्या शेतातील घरात घुसून चोरट्यांनी सोन्याचे दागिने व रोकड, असा अडीच लाख रुपयांचा ऐवज लंपास केला. ही घटना २६ रोजी पहाटे पाच वाजेच्या सुमारास घडली. रात्री जेवण करून परिवार घराबाहेर झोपला होता. ही संधी साधत चोरट्यांनी घरात हात साफ केला.
महादू अहिरे हे परिवारासह शेतात राहतात. शेती व बैल खरेदी-विक्रीचा व्यवसाय करून ते परिवाराची उपजीविका भागवतात. २५ रोजी सायंकाळी त्यांनी बैल विक्रीची उधारी जमा केलेली एक लाख २० हजार रुपयांची रक्कम घरी आणली होती. २६ रोजी पहाटे ५.४५ वाजेच्या सुमारास महादू अहिरे यांचा मुलगा झोपेतून उठला असता, त्याला घरातील सामान अस्ताव्यस्त पडलेले दिसले. त्याने घरात जावून पाहिले असता, घरातील लोखंडी कपाटातील साहित्य खाली पडलेले होते. कपाटाचे लॉकर उघडले असल्याचे दिसले.
कपाटातून १२ हजार रुपये किमतीचे ३ ग्रॅम वजनाचे मणी मंगळसूत्र, १२ हजार रुपये किमतीचे ३ ग्रॅम वजनाचे कानातील रिंग, ८ हजार रुपये किमतीचे २ ग्रॅम वजनाचे पैंडल, एक हजार रुपये किमतीचे अर्धा ग्रॅम वजनाची नथ व २ लाख १० हजार रुपयांची रोकड, असा एकूण २ लाख ४४ हजार रुपयांचा ऐवज चोरट्यांनी चोरून नेला. महादू सखाराम अहिरे यांच्या फिर्यादीवरून अज्ञात चोरट्यांविरुद्ध चाळीसगाव शहर पोलिसात गुन्हा दाखल झाला आहे.
टाकरखेडात भरदिवसा घरफोडी
अमळनेर : घरमालक मजुरीला गेलेले असताना भरदिवसा घरफोडी करून रोख रकमेसह ५८ हजार रुपयांचे दागिने लंपास करण्यात आले. ही घटना मंगळवारी दुपारी टाकरखेडा येथे घडली. टाकरखेडा येथील विजय अजबराव पाटील हे २७ रोजी सकाळी घराला कुलूप लावून सेंट्रिग कामाला, त्यांची पत्नी शेतात; तर मुले शाळेत निघून गेले होते. दुपारी दोन वाजता त्यांची पत्नी घरी आली. घरातील २४ हजार रुपये किमतीचे ८ ग्रॅम सोन्याचे काप, २१ हजार रुपये किमतीची ७ ग्रॅम सोन्याचे टोंगल, १२ हजार रुपये किमतीचे ४ ग्रॅम सोन्याचे मणी व पेंडल, १५०० रुपये रोख असा एकूण ५८ हजार ५०० रुपयांचा माल चोरीस गेला आहे.
