वारंवार सूचना देऊनही कामाकडे दुर्लक्ष; जिल्हाधिकाऱ्यांच्या आदेशानंतर कारवाई
जळगाव मिरर | २१ मार्च २०२६
मतदार यादी दुरुस्तीच्या कामात वारंवार सूचना देऊनही दिरंगाई करणाऱ्या सात बूथ लेव्हल ऑफिसर (बीएलओ) विरोधात अखेर गुन्हे दाखल करण्यात आले आहेत. जिल्हाधिकाऱ्यांनी दिलेल्या स्पष्ट निर्देशांनंतर शहर पोलिस ठाण्यात शुक्रवारी ही कारवाई करण्यात आली.
केंद्रीय निवडणूक आयोगाच्या वतीने राज्यात लवकरच मतदार याद्यांचा विशेष सखोल पुनर्निरीक्षण कार्यक्रम राबविण्यात येणार आहे. या पार्श्वभूमीवर पूर्वतयारी म्हणून सन २०२४ च्या मतदार यादीतील मतदारांचा शोध घेणे, बीएलओ अॅपमध्ये त्यांचे मॅपिंग करणे, अस्पष्ट छायाचित्रांची दुरुस्ती करणे तसेच एकसारख्या नोंदी (डीसीई) शोधणे अशी महत्त्वाची कामे सुरू आहेत.
या कामासाठी जळगाव शहरात एकूण ३५८ बीएलओंची नियुक्ती करण्यात आली होती. मात्र, यापैकी सात बीएलओंनी वारंवार नोटीस देऊनही काम सुरू केले नाही, तर काहींनी अत्यल्प काम केल्याचे निदर्शनास आले. संबंधित बीएलओंना १९ सप्टेंबर २०२५, ४ ऑक्टोबर २०२५, ३१ डिसेंबर २०२५ तसेच १६ फेब्रुवारी रोजी झालेल्या बैठकीत स्पष्ट सूचना देण्यात आल्या होत्या. याशिवाय अधिकाऱ्यांकडून ग्रुपवर संदेश पाठवूनही त्यांनी या कामाकडे दुर्लक्ष केल्याचे समोर आले.
दरम्यान, या कामाचा आढावा घेण्यासाठी जिल्हाधिकाऱ्यांनी ५ मार्च व १७ मार्च रोजी बैठक घेतली होती. या बैठकीत कामात हलगर्जीपणा करणाऱ्या बीएलओंवर थेट गुन्हे दाखल करण्याचे आदेश देण्यात आले होते. त्यानुसार तहसीलदार शीतल राजपूत यांनी कारवाईचे निर्देश दिले.
निवडणूक नायब तहसीलदार नवीनचंद्र भावसार यांनी शहर पोलिस ठाण्यात फिर्याद दिल्यानंतर महानगरपालिकेचे लिपीक विकास सावळे, संजय रामदास सपकाळे, शिक्षक तौसिफ शेख गणी, अंगणवाडी सेविका विमल सुपडू भारसके, शिक्षक रवींद्र अशोक कोळी, आरीफ खान इस्माईल खान आणि राहुल सुरेश धनगर यांच्याविरुद्ध गुन्हे दाखल करण्यात आले आहेत.
या कारवाईमुळे प्रशासकीय यंत्रणेत खळबळ उडाली असून, निवडणूक कामांमध्ये हलगर्जीपणा खपवून घेतला जाणार नाही, असा स्पष्ट संदेश प्रशासनाकडून देण्यात आला आहे.
