जळगाव मिरर | ५ एप्रिल २०२६
अमळनेर शहरात अत्यंत धक्कादायक प्रकार घडला असून, एका महिलेचा विनयभंग करत तिच्यावर व तिच्या पतीवर जीवघेणा हल्ला केल्याची घटना २९ रोजी सायंकाळी साडेपाच वाजेच्या सुमारास उघडकीस आली आहे. या प्रकरणी अमळनेर पोलिस ठाण्यात संशयिताविरुद्ध गुन्हा दाखल करण्यात आला असून पुढील तपास सुरू आहे.
मिळालेल्या माहितीनुसार, शहरातील एका भागात राहणारी महिला सायंकाळी अंगण झाडण्यासाठी बाहेर आली असता, तेथे उभा असलेला संशयित आरोपी हा तिच्याकडे टक लावून पाहत अश्लील इशारे करत होता. या प्रकारामुळे घाबरलेल्या महिलेने ही बाब संशयिताच्या पत्नीला सांगितली. यामुळे संतप्त झालेल्या संशयिताने व त्याच्या पत्नीने संबंधित महिलेच्या घरात जबरदस्तीने प्रवेश केला. त्यांनी महिलेवर शिवीगाळ करत मारहाण केली तसेच तिचा विनयभंग केल्याचा आरोप आहे. या घटनेने परिसरात भीतीचे वातावरण निर्माण झाले आहे. दरम्यान, पीडित महिलेचा पती भांडण सोडवण्यासाठी पुढे आला असता, संशयिताने त्याच्यावर बॅटने हल्ला करण्याचा प्रयत्न केला. हा वार पतीने हातावर झेलल्याने त्याला दुखापत झाली. सुदैवाने मोठा अनर्थ टळला.
या घटनेनंतर पीडितांनी अमळनेर पोलिस ठाण्यात धाव घेत तक्रार दाखल केली. पोलिसांनी तत्काळ गुन्हा नोंदवून तपासाला सुरुवात केली आहे. या प्रकरणाचा पुढील तपास हेडकॉन्स्टेबल प्रमोद पाटील करीत आहेत. दरम्यान, या घटनेमुळे नागरिकांमध्ये संताप व्यक्त होत असून, आरोपींवर कठोर कारवाई करण्याची मागणी जोर धरत आहे.
