जळगाव मिरर | २० जून २०२३
राज्यातील एका मोठ्या शहरातील वसतिगृहातील अल्पवयीन मुलींना संध्याकाळी, रात्री पर्यटकांंसमोर नाचवल्याचा धक्कादायक प्रकार समोर आल्याने राज्यातील शैक्षणिक क्षेत्रात मोठी खळबळ उडाली आहे.
मिळालेल्या माहितीनुसार, नाशिक शहरातील त्र्यंबकेश्वर तालुक्यात असलेल्या वसतिगृहातील अल्पवयीन मुलींना संध्याकाळी, रात्री आल्येल्या पर्यटकांंसमोर नाचवल्याचा धक्कादायक प्रकार उघडकीस आला आहे. या प्रकरणी संस्थेचे चालक आणि शिक्षिकेविरुद्ध वाडीवऱ्हे पोलिस ठाण्यात गुन्हा दाखल करण्यात आला आहे. या अल्पवयीन मुलींनी पर्यटकांसमोर नाचण्यास नकार दिल्याने त्यांना दमदाटी व छड्यांनी मारहाण केल्याचीही माहिती समोर आली आहे. हि घटना मुलींनीच पालकांना सांगितल्यानंतर हा प्रकार उघडकीस आला आहे. मुलींनी तक्रार करताच पालकांनी पोलिसांकडे धाव घेतली. तसेच, घडलेल्या प्रकारानंतर पालकांनी मुलींना वसतिगृहातून घरी आणले आहे. त्र्यंबकेश्वर तालुक्यातील पहिने येथे ही घटना घडली आहे. पालकांनी पोलिसांकडे दिलेल्या तक्रारीनुसार, पहिने येथे एका खासगी संस्थेची काही वर्षांपासून इंग्रजी माध्यमाची शाळा आहे. याच शाळेतर्फे यंदा मुलींसाठी वसतिगृह सुरू करण्यात आले. शाळा सुरू होण्यापूर्वी सातवी ते नववीपर्यंतच्या मुलींना या वसतिगृहात प्रवेश देण्यात आला. शाळा सुरू होण्यापूर्वी मुलींना पारंपरिक नृत्य व संगणकाचे शिक्षण दिले जाणार असल्याचे सांगत संस्थेने पालकांकडून 3, 500 रुपये अनामत रक्कम घेतली.
संस्थेच्या शाळेमागील टेकडीवर हॉटेल आहे. तेथे मे महिन्याच्या अखेरीस काजवे पाहण्यासाठी पर्यटक येतात. त्यांच्यासमोर सायंकाळी 6 ते रात्री 9 दरम्यान जबरदस्तीने नाचण्यास सांगितले जाते, असा आरोप वसतिगृहातील मुलींनी केला आहे. नाचले नाही तरी शिक्षिका संस्थाचालकांच्या सांगण्यावरून दमदाटी करतात व छड्या मारतात, अशी तक्रार मुलींनी पालकांकडे केली. त्यानंतर संतप्त पालकांनी मुलींना घरी आणत पोलिसांकडे तक्रार दिली आहे. दरम्यान, मुलींना जबरदस्तीने पर्यटकांसमोर नाचवले जात असल्याचा आरोप वसतिगृहाचे चालक व तेथील शिक्षिकांनी फेटाळून लावला आहे. आरोपांबाबत एका शिक्षिकेने सांगितले आहे की, आम्ही मुलींना केवळ पारंपरिक नृत्य शिकवतो. त्यांना इतरांसमोर नाचण्यास सांगितलेले नाही. शिक्षिका मुलींना नृत्य शिकवत असताना कदाचित पर्यटक ते पाहत असतील, एवढेच. यासंदर्भात पुढे काळजी घेऊ.
