जळगाव मिरर । १६ डिसेंबर २०२२
डांभुर्णी येथे शेतकऱ्यांकडून कापूस भरल्यानंतर दुपारच्या सुमारास तो मुकटी येथे जाण्यासाठी निघालेला ट्रकचा अपघात झाला आहे. कापूस भरून निघालेल्या ट्रकला समोरून येणाऱ्या वाहनाने कट मारला. यामुळे चालकाचे नियंत्रण सुटल्यामुळे ट्रक ममुराबाद ते विदगाव रस्त्यावरील हातेड नाल्याच्या वळणावर उलटल्याची घटना गुरुवारी दुपारी चार वाजेच्या सुमारास घडली. या अपघातात राज रवींद्र भिल अहिरे (२०, रा. मुकटी, जि. धुळे) या तरुणाला गंभीर दुखापत झाल्याने त्याचा जागीच मृत्यू झाला, तर वाहनातील चालकासह ७ मजूर गंभीर जखमी झाले. त्यांच्यावर शासकीय वैद्यकीय रुग्णालयात उपचार सुरू आहे.
धुळे जिल्ह्यातील मुकटी येथील ट्रक (एमएच १८ एए १०८०) कापूस घेण्यासाठी गुरुवारी सकाळी मजुरांना घेऊन यावल तालुक्यात आला होता. डांभुर्णी येथे शेतकऱ्यांकडून कापूस भरल्यानंतर दुपारच्या सुमारास तो मुकटी येथे जाण्यासाठी निघाला. दुपारी ४ वाजेच्या सुमारास ममुराबाद ते विदगाव रस्त्यावरील फार्मसी कॉलेजजवळून जात असताना समोरून येणाऱ्या अज्ञात वाहनाने कट मारला. यात चालकाचा ट्रकवरील नियंत्रण सुटल्याने ट्रक हा वळणावर असलेल्या हातेड नाल्याजवळ पलटी झाला. या अपघातात ट्रकमध्ये बसलेले मजूर गंभीर जखमी झाले, तर राज रवींद्र भिल अहिरे हा तरुण जागीच ठार झाला. ट्रकच्या केबिनसह वर बसलेले मजूर हे रस्त्याच्या कडेला असलेल्या झुडपांमध्ये फेकले गेले, तर काही मजूर हे थेट ट्रकखाली दाबले गेल्याने ते गंभीर जखमी झाले आहेत. ग्रामस्थांनी घटनास्थळी धाव घेऊन जखमींना बाहेर काढत त्यांना तातडीने रुग्णवाहिकेतून जिल्हा रुग्णालयात दाखल केले. याठिकाणी जखमींवर उपचार सुरु आहे.
अपघातातील जखमी मजूर
या अपघातात प्रमोद संभाजी पाटील (४०), भरत दगडू पाटील (३२), डिगंबर दिलीप पाटील (३०), रवींद्र बारकू भिल-अहिरे (५०), जितेंद्र पवार (३५), निंबा दगडू पाटील (३६) आणि बुधा पाटील (६०, सर्व रा. मुकटी, ता. जि. धुळे) हे गंभीर जखमी झाले आहेत.
