जळगाव मिरर | ३ फेब्रुवारी २०२६
सोने-चांदीच्या बाजारात सुरू असलेली घसरण थांबण्याचे नाव घेत नसून सोमवारी पुन्हा एकदा मौल्यवान धातूंनी मोठी आपटी घेतली. चांदीच्या भावात तब्बल २७ हजार रुपयांची घसरण झाल्याने चांदी २ लाख ४८ हजार रुपये प्रतिकिलो या दरावर आली आहे. तर सोन्याच्या भावात ८ हजार ५०० रुपयांची घट नोंदवली गेल्याने सोने १ लाख ४६ हजार ५०० रुपये प्रतितोळा इतके स्वस्त झाले आहे.
अवघ्या पाच दिवसांपूर्वीपर्यंत सोने-चांदीच्या दरवाढीला ब्रेक लागत नसल्याचे चित्र होते. मात्र आता परिस्थिती पूर्णतः उलटली असून घसरणीला ब्रेक लागत नसल्याची अवस्था निर्माण झाली आहे. रविवारी चांदीच्या भावात २५ हजार रुपयांची घसरण झाली होती. त्यानंतर २ फेब्रुवारी रोजी पुन्हा २७ हजार रुपयांची घसरण झाल्याने चांदी अडीच लाखांच्या आत घसरली आहे.
दुसरीकडे सोन्याच्या भावातही मोठ्या प्रमाणावर घसरण सुरूच आहे. ३१ जानेवारी रोजी ८ हजार रुपये आणि १ फेब्रुवारी रोजी ४ हजार रुपयांची घट होऊन सोने १ लाख ५५ हजार रुपयांवर आले होते. सोमवारी पुन्हा ८ हजार ५०० रुपयांची घसरण झाल्याने सोने थेट दीड लाखाच्या आत घसरले आहे. या सततच्या चढ-उतारांमुळे गुंतवणूकदार आणि सराफ बाजारात चिंतेचे वातावरण आहे.
