महापौर दीपमाला काळे यांचेकडून प्रदीर्घ सेवेचा गौरव
जळगाव मिरर | १ एप्रिल २०२६
जळगाव शहर महानगरपालिकेच्या सेवेतून सेवानिवृत्त झालेल्या दोन कर्मचाऱ्यांचा महापौर दीपमाला काळे यांच्या हस्ते महापौर दालनात सन्मान करण्यात आला. शाल, श्रीफळ आणि “पंच परिवर्तन”पुस्तक देऊन महापौरांनी या कर्मचाऱ्यांच्या प्रदीर्घ सेवेचा गौरव केला.
सत्कारमूर्ती कर्मचारी
संजय वसंतराव महाजन : १९९६ पासून (नगरपालिका काळापासून) महानगरपालिकेपर्यंत तब्बल ३० वर्षे वाहन चालक म्हणून त्यांनी सेवा बजावली. यावेळी त्यांचा सहपरिवार सत्कार करण्यात आला. विजय देवरे : नगरसचिव कार्यालयातील आपल्या प्रदीर्घ आणि निष्कलंक सेवेबद्दल त्यांचाही सन्मान करण्यात आला. यावेळी त्यांचे चिरंजीव, कन्या, सून आणि जावई असा सर्व परिवार उपस्थित होता.
महापौर पदभार स्वीकारल्यापासून दीपमाला काळे यांनी कर्मचाऱ्यांमध्ये चैतन्यमय वातावरण निर्माण करण्यावर भर दिला आहे. निवृत्त होणाऱ्या कर्मचाऱ्यांचा सन्मान करून त्यांच्या कामाप्रती कृतज्ञता व्यक्त करणे, हा याच प्रयत्नांचा एक भाग आहे.
”तुम्ही नगरपालिका ते महानगरपालिका असा सुवर्णकाळ तुम्ही स्वतः पाहिला आहात. आता महापालिकेच्या सेवेतून निवृत्त झाला असलात, तरी आता खऱ्या अर्थाने तुमच्या स्वतःची जबाबदारी आणि आनंदाचा काळ सुरू झाला आहे. तुमची ही ‘सेकंड इनिंग’ भरभरून जगा.” — दीपमाला काळे, महापौर
कृतज्ञता आणि भावना
सत्काराला उत्तर देताना दोन्ही कर्मचाऱ्यांनी आपल्या भावना व्यक्त केल्या. नगरपालिका ते महानगरपालिका अशा प्रवासात नागरिकांची सेवा करता आली, याचे समाधान मोठे असल्याचे त्यांनी सांगितले. महापौरांनी दाखवलेल्या या आपुलकीबद्दल त्यांनी विशेष आभार मानले. या कार्यक्रमाचे प्रस्तावनापर निवेदन पुरुषोत्तम जोशी यांनी केले. याप्रसंगी नगरसचिव सतीश शुक्ला यांच्यासह महापालिकेचे इतर अधिकारी आणि कर्मचारी उपस्थित होते.
