जळगाव मिरर | २३ डिसेंबर २०२५
नशिराबाद रस्त्यावरील चिरमाडे पेट्रोल पंपासमोर सोमवारी सायंकाळी सुमारे ७ वाजेच्या सुमारास भरधाव कारने मालवाहू वाहनाला जोरदार धडक दिल्याने भीषण अपघात घडला. या अपघातात कारमधील दोघे गंभीर जखमी झाले असून, त्यांना तातडीने जळगाव शासकीय वैद्यकीय महाविद्यालय व रुग्णालयात (जीएमसी) दाखल करण्यात आले आहे.
भुसावळकडून जळगावकडे येणारी मारुती बलेनो चारचाकी (क्रमांक एमएच-१९ सीव्ही ६३८७) आणि जळगावकडून अमरावतीकडे खजूर घेऊन जाणारे महेंद्र पिकअप मालवाहू वाहन यांच्यात हा अपघात झाला. चिरमाडे पेट्रोल पंपासमोर भरधाव वेगातील कारने मालवाहू वाहनाला धडक दिली. धडकेनंतर कार तीन पलट्या घेत रस्त्याच्या कडेला असलेल्या खड्ड्यात फेकली गेली. या वेळी कारचे एअरबॅग उघडल्याने चालक व त्याच्या बाजूला बसलेला प्रवासी थोडक्यात बचावले, मात्र जोरदार धडकेमुळे ते गाडीत मागे फेकले गेल्याने गंभीर जखमी झाले.
दरम्यान, धडकेनंतर महेंद्र पिकअप मालवाहू वाहन रस्त्यावरील दुभाजकावर चढले. अपघातामुळे काही काळ जळगाव–नशिराबाद मार्गावरील वाहतूक ठप्प झाली असून, वाहनांच्या लांबच लांब रांगा लागल्या होत्या. घटनास्थळी जमलेल्या नागरिकांनी तत्काळ मदत करत जखमींना कारमधून बाहेर काढून जीएमसीत दाखल केले.
दरम्यान, तरसोद बायपासकडील सर्व्हिस रोडचे काम सुरू असल्याने डाव्या बाजूचा सर्व्हिस रोड बंद होता. त्यामुळे एकाच बाजूने वाहतूक सुरू असल्याने अपघात घडल्याचा प्राथमिक अंदाज व्यक्त करण्यात आला आहे. या प्रकरणी रात्री उशिरापर्यंत नशिराबाद पोलिस ठाण्यात कोणतीही नोंद झालेली नव्हती.
