जळगाव मिरर / १० एप्रिल २०२३ ।
अमळनेर शहरातील लालबाग शॉपिंग कॉम्प्लेक्समध्ये असणाऱ्या एका फळविक्रेत्याला जुन्या भांडणाच्या कारणावरून दुकानात घुसून मारहाण करण्यात आली. तसेच गळ्याला चाकू लावून त्याच्याजवळ असलेल्या फळविक्रीचे पैसे हिसकावून नेणाऱ्या एकावर अमळनेर पोलिसात गुन्हा दाखल करण्यात आला आहे.
मिळालेल्या माहितीनुसार, शहरातील लालबाग शॉपिंग कॉम्प्लेक्समध्ये फळविक्रीचे दुकान ज्ञानेश्वर रतन साटोटे यांचे आहे. दि ७ रोजी सकाळी ९ वाजेच्या सुमारास मनोज ऊर्फ आर्यमान मंगल बिऱ्हाडे (राजारामनगर) हा रिक्षा घेऊन दुकानात आला व शिवीगाळ करू लागला. तसेच लाथाबुक्क्यांनी मारहाण करण्यास सुरुवात केली व कमरेला असलेला चाकू काढून गळ्याला लावत जिवे मारण्याची धमकी दिली. फळविक्रीचे जमा झालेले दीड हजार रुपये शर्टच्या वरच्या खिशातून काढून घेतल्याने त्याच्याविरुद्ध अमळनेर पोलिसात गुन्हा दाखल करण्यात आला आहे.
