जळगाव मिरर | २ एप्रिल २०२६
सोशल मीडियावर स्वतःला ‘भाई’ म्हणून प्रसिद्धी मिळवण्याच्या नादात एका तरुणाला पोलिसांच्या कारवाईचा चांगलाच फटका बसला आहे. इन्स्टाग्रामवर भाईगिरीची भाषा वापरत रील पोस्ट करणाऱ्या चेतन सोळंके या तरुणाला जळगाव शहर पोलिसांनी ताब्यात घेत कायद्याचा धडा शिकवला. पोलिसांचा ‘खाक्या’ पाहताच संबंधित तरुणाने हात जोडून माफी मागितल्याची घटना समोर आली आहे.
सध्या तरुणांमध्ये सोशल मीडियावर भाईगिरी, शस्त्रांचे प्रदर्शन किंवा गुंडशाहीचे समर्थन करणाऱ्या रिल्स बनवण्याचा ट्रेंड वाढताना दिसत आहे. याच पार्श्वभूमीवर चेतन सोळंके याने इन्स्टाग्रामवर भाईगिरीची भाषा वापरत एक रील पोस्ट केली होती. संबंधित व्हिडिओ अल्पावधीतच व्हायरल झाला. मात्र, या प्रकाराची गंभीर दखल घेत जळगाव शहर पोलिसांनी तात्काळ कारवाई करत संबंधित तरुणाला ताब्यात घेतले.
पोलिसांनी त्याला कायद्याची जाणीव करून देत अशा प्रकारच्या कृत्यांचे परिणाम समजावून सांगितले. या कारवाईनंतर घाबरलेल्या चेतन सोळंके याने त्वरित आपली भूमिका बदलली. पोलिसांसमोर उभे राहून त्याने एक नवीन व्हिडिओ तयार केला, ज्यामध्ये त्याने आपल्या चुकीबद्दल दिलगिरी व्यक्त केली.
या माफीच्या व्हिडिओमध्ये तो म्हणतो, “जळगाव जिल्हा हा कायद्याचा बालेकिल्ला आहे. माझ्याकडून चुकीची रील पोस्ट झाली होती, त्याबद्दल मी माफी मागतो. यापुढे मी किंवा माझ्या मित्रपरिवारातील कोणीही अशा प्रकारचे व्हिडिओ तयार करणार नाही.” या घटनेनंतर सोशल मीडियावर स्टंटबाजी व गुन्हेगारीचे उदात्तीकरण करणाऱ्यांमध्ये भीतीचे वातावरण निर्माण झाले आहे. अशा प्रकारांना अजिबात पाठीशी घातले जाणार नाही, असा कडक इशारा पोलिस प्रशासनाने दिला आहे.
