जळगाव मिरर । १३ डिसेंबर २०२५
गेल्या काही महिन्यापासून शहरातील अनेक ठिकाणी चोरीच्या घटना घडल्या असून आता एका अंतरराज्यीय अट्टल चोरट्याला जळगावच्या स्थानिक गुन्हे शाखेच्या पथकाने अटक केली आहे. त्यानेही चोरी इतर पाच साथीदारांच्या मदतीने चोरी केल्याची कबुली दिली आहे.
गेल्या महिनाभरापासून जळगाव शहरात वाढलेल्या घरफोडी चोरीच्या घटनांना आळा घालण्यासाठी पोलीस अधीक्षक डॉ. महेश्वर रेड्डी आणि अपर पोलीस अधीक्षक अशोक नखाते यांनी स्थानिक गुन्हे शाखेला विशेष तपासाचे आदेश दिले होते. या आदेशानुसार, एलसीबीचे पोलीस निरीक्षक राहुल गायकवाड यांनी एक विशेष पथक तयार करून तपास सुरू केला होता. या पथकाने तांत्रिक विश्लेषण आणि सीसीटीव्ही फुटेजच्या आधारे तपास करत मध्यप्रदेशातील धार जिल्ह्यातील कुक्षी तालुक्यातील रहिवासी असलेल्या रमेश भुरूसिंग अनारे (वय २७) या आंतरराज्यीय अट्टल गुन्हेगाराला ताब्यात घेतले.
चौकशीदरम्यान आरोपी रमेश अनारे याने जळगाव एमआयडीसी पोलीस स्टेशन हद्दीतील चार घरफोडीच्या गुन्ह्यांची कबुली दिली. इतकेच नव्हे, तर या गुन्ह्यांमध्ये मध्यप्रदेशातील त्याचे पाच साथीदार, ज्यात कुंद्या डावरीया, बरदान देवका, कालु डावरीया, राहुल डावरीया आणि सुनिल परमाती यांचाही समावेश असल्याची महत्त्वपूर्ण माहिती त्याने उघड केली आहे. आरोपी रमेश अनारे याला पुढील कारवाईसाठी एमआयडीसी पोलिसांच्या ताब्यात देण्यात आले असून, पोलीस उपनिरीक्षक चंद्रकांत धनके पुढील तपास करत आहेत.
