जळगाव मिरर | २ ऑगस्ट २०२५
जामनेर तालुक्यातील गोद्री शिवारातील कांग प्रकल्पाच्या उत्तरेस असलेल्या कांग नदीपात्रात मादी जातीचा बिबट्या मृत अवस्थेत आढळून आला. १ ऑगस्ट रोजी सकाळी सुमारे ९ वाजता स्थानिक शेतकऱ्यांना ही घटना निदर्शनास आली. त्यांनी तात्काळ गोद्री परिमंडळाचे वनपाल समाधान धनवट यांना माहिती दिली.
वनपाल धनवट यांनी वनरक्षक कुनाल जाधव आणि मंगेश निकम यांच्यासह घटनास्थळी जाऊन पाहणी केली आणि वनपरिक्षेत्र अधिकारी सूरज आवारे यांना याबाबत कळवले. नंतर वनपरिक्षेत्र अधिकारी सूरज निकम, वनरक्षक मुकेश बोरसे, मीना कोकणे, तसेच पशुधन विकास अधिकारी डॉ. राहुल ठाकूर (शहापूर), डॉ. मंगेश टाक (वाकोद), डॉ. भारती कुरेल (फत्तेपूर) आणि व्रण उपचारक रोहीदास चव्हाण (फत्तेपूर) यांनी घटनास्थळी दाखल होऊन पुढील कार्यवाही केली.
पशुवैद्यकीय अधिकाऱ्यांनी दिलेल्या प्राथमिक माहितीनुसार, बिबट्याचा मृत्यू सुमारे तीन ते चार दिवसांपूर्वी झाला असावा. बिबट्या सुमारे ५ ते ६ वर्षांचा असून मृत्यूचे नेमके कारण अद्याप स्पष्ट झालेले नाही. त्याच्या मृतदेहाचे नमुने फॉरेन्सिक तपासणीसाठी प्रयोगशाळेत पाठविण्यात आले आहेत. बिबट्या कुजलेल्या अवस्थेत आढळल्यामुळे जागेवरच शवविच्छेदन करून त्याची शासकीय इतमामात विल्हेवाट लावण्यात आली.
