जळगाव मिरर | १३ मार्च २०२६
महाराष्ट्र नवनिर्माण सेनेच्या सदस्य नोंदणी मोहिमेला आता मराठी चित्रपटसृष्टीतील कलाकारांनी पाठिंबा दिला आहे. मनसेप्रमुख राज ठाकरे यांच्या उपस्थितीत अनेक कलाकारांनी पक्षाचे सभासदत्व स्वीकारले, ज्यामुळे सदस्य नोंदणी मोहिमेला नवे उत्साहाचे वातावरण निर्माण झाले आहे.
दादर येथील ‘शिवतीर्थ’ या निवासस्थानी आयोजित विशेष कार्यक्रमात ही सदस्य नोंदणी पार पडली. यावेळी अभिनेते पुष्कर श्रोत्री, भरत जाधव, दिग्दर्शक केदार शिंदे तसेच अॅडव्होकेट गुरु भरत दाभोलकर उपस्थित होते. मराठी कलाक्षेत्रातील या मान्यवरांच्या उपस्थितीमुळे कार्यक्रमाला विशेष रंग चढला. कलाकारांनी राज ठाकरे यांच्या नेतृत्वावर विश्वास व्यक्त करत पक्षाच्या उपक्रमांना पाठिंबा दिला.
मनसेच्या 20 व्या वर्धापन दिनानिमित्त 9 मार्च रोजी किल्ले रायगडाच्या पायथ्याशी मोठ्या उत्साहात वर्धापन दिन साजरा करण्यात आला. त्या कार्यक्रमात राज ठाकरे यांनी पदाधिकारी आणि कार्यकर्त्यांना राज्यातील सदस्य नोंदणी मोहिमेला गती देण्याचे आवाहन केले होते. तसेच स्थानिक पातळीवर संघटना अधिक मजबूत करण्यासाठी आणि जनसंपर्क वाढवण्यासाठी पदाधिकाऱ्यांनी अधिक सक्रिय राहावे, असेही सांगितले होते.
या पार्श्वभूमीवर दादर येथील कार्यक्रमात मराठी चित्रपटसृष्टीतील कलाकारांनी सहभाग घेतल्यामुळे मनसेच्या सदस्य नोंदणी मोहिमेला नवीन ऊर्जा मिळाली आहे. मनसेच्या चित्रपट सेनेचे अध्यक्ष अमेय खोपकर आणि पक्षाच्या नेत्या शालिनी ठाकरेदेखील उपस्थित होत्या. राज ठाकरे यांच्या आवाहनाला प्रतिसाद देत मराठी चित्रपटसृष्टीतील मान्यवरांनी पक्षाचे सभासदत्व स्वीकारले असल्याने, आगामी काळात या मोहिमेला आणखी गती मिळण्याची अपेक्षा व्यक्त केली जात आहे.
