जळगाव मिरर | १२ जून २०२५
फैजपूर येथील हॉटेल मधील बिलावरून झालेल्या भांडणात हॉटेल व्यवस्थापक व त्याच्या दोन मित्रांना चार जणांनी बेदम मारहाण करून गावठी कट्टा रोखून जिवे ठार मारण्याचा प्रयत्न केला. ही घटना दि. १० रोजी रात्री पावणेबाराच्या सुमारास सुभाष चौकात घडली. याप्रकरणी शेख आरिफ शेख कलीम, शाहरुख शेख, आसिफ शेख, आकीब शेख यांच्याविरुद्ध गुन्हा दाखल केला आहे.
सविस्तर वृत्त असे कि, यावल रोडवरील हॉटेल तृभावी येथे मंगळवारी दुपारी तीन वाजता बिलावरून भांडण झाले असता हॉटेलचे व्यवस्थापक सुमित उर्फ छोटू मार्तंड साळुंके (रा. फैजपूर) याला जातीवाचक शिवीगाळ करण्यात आली होती. याबाबत सुमित साळुंके याने फोनवरून जाब विचारला होता याचा राग मनात धरून सुमित साळुंके व त्याचे मित्र अमोल तायडे, सागर भालेराव यांना मंगळवारी रात्री चौघांनी मारहाण केली. यात तिघेही जखमी झाले आहे. याघटनेप्रकरणी सुमित साळुंके यांनी दिलेल्या फिर्यादीवरून गुन्हा दाखल झाला आहे. तपास पोलीस उपअधीक्षक कृष्णत पिंगळे, स पो. नी रामेश्वर मोताळे, पीएसआय नीरज बोकील, विनोद गभाने करीत आहेत.
