जळगाव मिरर | १० ऑगस्ट २०२५
जळगाव जिल्ह्यातील शासकीय रुग्णालयांमधील कारभारावर नेहमीच प्रश्नचिन्ह उपस्थित होत असताना, मुक्ताईनगर उपजिल्हा रुग्णालयातील एका धक्कादायक प्रकाराने पुन्हा एकदा आरोग्य विभागाचा भोंगळ कारभार समोर आला आहे. स्थानिक आमदार चंद्रकांत पाटील यांनी रुग्णालयाला अचानक भेट दिली असता, सुरक्षारक्षक चक्क दारूच्या नशेत कर्तव्यावर असल्याचे उघड झाले.
रुग्णालयात पोहोचताच आमदारांनी परिसराची पाहणी करत असताना एक सुरक्षारक्षक वावरताना संशयास्पद वाटला. त्याच्याशी संवाद साधताच त्याच्या वागणुकीतून आणि बोलण्यातून तो नशेत असल्याचे स्पष्ट झाले. आमदार चंद्रकांत पाटील यांनी त्याला थेट प्रश्न विचारले असता, संबंधित सुरक्षारक्षकाने दारू पिल्याचे स्पष्टपणे कबूल केले. या घटनेचा व्हिडीओ सध्या समाजमाध्यमांवर वेगाने व्हायरल होत असून, नागरिकांमध्ये संताप व्यक्त होत आहे. रुग्णांची सेवा करण्याच्या ठिकाणीच सुरक्षारक्षकच दारूच्या नशेत असावा, हा गंभीर निष्काळजीपणा असल्याचे लोकांचे म्हणणे आहे.
या घटनेनंतर आमदार पाटील यांनी रुग्णालयातील इतर कर्मचाऱ्यांनाही धारेवर धरले. अशा प्रकारांना मोकळे रान का मिळते, व्यवस्थापन झोपले आहे का, याचा खरपूस समाचार त्यांनी घेतला. तसेच, या सुरक्षारक्षकावर कारवाई होईल का, आणि संबंधित कंत्राटदाराविरोधात काय पावले उचलली जातील, याबाबत त्यांनी अधिकाऱ्यांकडे उत्तर मागितले आहे. रुग्णालयासारख्या संवेदनशील ठिकाणी सुरक्षारक्षक जर मद्यधुंद अवस्थेत असेल, तर रुग्णांची व त्यांच्या नातेवाईकांची सुरक्षा धोक्यात येऊ शकते. एखादी अनुचित घटना घडली असती, तर त्याची जबाबदारी कोण घेत असता? असा सवाल आता जनतेकडून विचारला जात आहे.
या प्रकरणावर आरोग्य विभाग किंवा जिल्हा प्रशासनाकडून अद्याप अधिकृत प्रतिक्रिया मिळालेली नाही. मात्र व्हिडीओ व्हायरल झाल्यामुळे या प्रकरणात लवकरच कारवाई होण्याची शक्यता आहे.
