जळगाव मिरर | ७ जानेवारी २०२४
चोपडा तालुक्यातील एका गावातील १८ वर्षीय तरुणीवर आधी एकाने व नंतर तिघांनी सामूहिक अत्याचार केल्याची संतापजनक घटना घडली आहे. या प्रकरणी संशयित आरोपींना ताब्यात घेण्यात आले आहे.
मिळालेल्या माहितीनुसार, चोपडा तालुक्यातील एका गावात १८ वर्षीय मुलगी आपल्या परिवारासह वास्तव्यास असून दि.२ जानेवारी रोजी दुपारी तरुणीच्या घरात संशयित आरोपी गफूर गबू तडवी (वय ३३) याने घुसून धमकी देत तिच्यावर अत्याचार केला. एवढेच नाही, तर या तरुणीला यावल तालुक्यात भेटायला ये नाहीतर, ठार मारण्याची धमकी दिली. घाबरून ही तरुणी यावल येथे पोहोचली. त्यावेळी बांधकाम सुरू असलेल्या ठिकाणी तीन जणांनी दारूच्या नशेत तरुणीला आधी सहानुभूती दाखवली. नंतर जिवे मारण्याची धमकी देत आळीपाळीने अत्याचार केला. ४ जानेवारी रोजी रात्री १२ ते पहाटे तीन वाजेदरम्यान ही घटना घडली. या प्रकारानंतर युवतीने दिलेल्या फिर्यादीवरून वरील चारही जणांविरुद्ध अडावद पोलिसात गुन्हा दाखल करण्यात आला. आरोपींना ताब्यात घेण्यात आले असून, तपास सहायक पोलिस निरीक्षक गणेश बुवा हे करीत आहेत.
