जळगाव मिरर | २४ ऑगस्ट २०२५
राज्यातील पुणे शहरातून एक खळबळजनक बातमी समोर आली आहे. एका नामांकित कॉलेजच्या विद्यार्थ्यांसाठी आयोजित केलेल्या फ्रेशर्स पार्टीवर मनसेच्या महाराष्ट्र नवनिर्माण विद्यार्थी सेनेने (मनविसे) धडक कारवाई केली आहे. ही पार्टी राजाबहादूर मिल्स येथील ‘किकी’ नावाच्या पबमध्ये आयोजित करण्यात आली होती. या पार्टीत अल्पवयीन मुलांना मोठ्या प्रमाणात दारू पुरवली जात असल्याचा आरोप मनविसेने केला आहे.
एमआयटी-वर्ल्ड पीस युनिव्हर्सिटी, सिम्बायोसिस आणि व्हीव्हीआयटीसारख्या कॉलेजच्या विद्यार्थ्यांसाठी ही पार्टी आयोजित करण्यात आली होती. शुक्रवारी, 22 ऑगस्ट रोजी आयोजित केलेल्या या पार्टीत 17 ते 21 वयोगटातील शेकडो तरुण-तरुणी सहभागी झाले होते. पब चालकांनी कोणत्याही प्रकारचे ओळखपत्र न तपासता किंवा एंट्रीची नोंद न ठेवता या विद्यार्थ्यांना पार्टीत प्रवेश दिला. विशेषतः अल्पवयीन मुलांना मद्य पुरवल्याची बाब समोर आल्यानंतर महाराष्ट्र नवनिर्माण विद्यार्थी सेनेने आक्रमक भूमिका घेतली.
मनविसेच्या पदाधिकाऱ्यांनी तात्काळ राज्य उत्पादन शुल्क विभागाच्या अधिकाऱ्यांशी संपर्क साधला आणि त्यांच्यासोबत मिळून ‘किकी’ पबवर छापा टाकला. त्यावेळी पार्टी पूर्णपणे सुरू होती. अधिकाऱ्यांनी तातडीने ही पार्टी बंद पाडली आणि पार्टीचे आयोजक व पब चालकांवर कारवाई सुरू केली. रात्री दोन वाजेपर्यंत ही कारवाई सुरू होती.
मनविसेचे शहराध्यक्ष धनंजय दळवी यांच्या नेतृत्वाखाली हे आंदोलन करण्यात आले. यावेळी मनविसे राज्य कार्यकारिणी सदस्य अभिषेक थिटे, उप शहर अध्यक्ष विक्रांत भिलारे, परिक्षीत शिरोळे यांच्यासह अनेक पदाधिकारी व महाराष्ट्र सैनिक उपस्थित होते. मनविसेने फ्रेशर्स पार्टीच्या नावाखाली तरुण-तरुणींना व्यसनाधीन करण्याच्या या प्रवृत्तीचा मनसेने तीव्र निषेध केला. मनसेने पब चालकांना थेट इशारा दिला आहे की, “यापुढे जर कोणत्याही पब किंवा रेस्टॉरंटने फ्रेशर्स पार्टीच्या नावाखाली अल्पवयीन मुलांना दारू दिली, तर त्या पबची एकही काच शिल्लक राहणार नाही, संपूर्ण पब फोडून टाकला जाईल.” या घटनेमुळे शहरातील पबमध्ये चालणाऱ्या अवैध धंद्यांवर पुन्हा एकदा प्रश्नचिन्ह निर्माण झाले आहे.
