जळगाव मिरर | २५ ऑक्टोबर २०२३
जळगाव शहरातील एका परिसरात २३ वर्षीय विवाहितेचा भरदुपारी घरात विनयभंग केल्याची घटना उघडकीस आली आहे. या प्रकरणी एका विरोधात जिल्हा पेठ पोलिसात गुन्हा दाखल करण्यात आला आहे.
मिळालेल्या माहितीनुसार, शहरातील एका परिसरातील २३ वर्षीय महिलेला दि.२३ ऑक्टोबर रोजी दुपारच्या सुमारास संशयित आरोपी डिगंबर चौधरी याने संपर्क करून मला सर्व मिटवायचे असून, तू घरी ये असे सांगून दुपारच्या वेळेस घरी बोलविले. ही महिला त्याच्या घरी गेली असता काही समजण्यापूर्वीच त्याने महिलेच्या तोंडावर मारले व तिचा विनयभंग केला. तू मला हवी आहेस असा तो ओरडू लागल्याने चौधरी याची आई व भाची घरातून बाहेर आले. महिलेने त्याच्या तावडीतून सुटका करण्याचा प्रयत्न केला असता तिचे कपडेही या तरुणाने फाडले. याप्रकरणी महिलेने जिल्हा पेठ पोलिस ठाण्यात फिर्याद दिली. त्यावरून डिगंबर ऊर्फ सुनील चौधरी याच्याविरुद्ध गुन्हा दाखल करण्यात आला आहे. पुढील तपास पोहेकॉ वंदना चौधरी करीत आहेत.