जळगाव मिरर | २३ जून २०२४
राज्यातील पुणे शहरात गेल्या काही महिन्यापासून अत्याचाराच्या घटना नियमित घडत असतांना नुकतेच माणुसकीला काळिमा फासणारी धक्कादायक घटना उघडकीस आली आहे. एका तेरा वर्षीय अल्पवयीन मुलीवर वडील, चुलता आणि चुलत भावाने अत्याचार केल्याची खळबळजनक घटना पुण्याच्या हडपसर परिसरात असलेल्या मांजरी येथे घडल्याने मोठी खळबळ उडाली आहे.
मिळालेल्या माहितीनुसार, हा प्रकार जुलै 2022 ते 10 जून 2024 या कालावधी दरम्यान घडला असून पीडित मुलीने याबाबत आईला सांगितल्यावर वडील, चुलत भाऊ आणि चुलत्या विरोधात गुन्हा दाखल करण्यात आला आहे. याप्रकरणी 13 वर्ष 10 महिने वयाच्या अल्पवयीन मुलीने फिर्याद दिली आहे. त्यानुसार हडपसर पोलिसांनी भारतीय दंड विधान 376, 376 (आय), 323, 506, बाललैंगिक अत्याचार प्रतिबंधक कायदा कलम 4, 6, 8, 12 अन्वये गुन्हा नोंदवला आहे. पोलिसांनी दिलेल्या माहितीनुसार, पीडित मुलगी तिच्या आई, वडील, चुलते, चुलत भाऊ अशा एकत्र कुटुंबात मांजरी मधील घुले नगर परिसरात राहायला आहे. हे कुटुंब परप्रांतीय असून कामानिमित्त पुण्यात राहते.
जुलै 2022 मध्ये तिच्या चुलत भावाने राहत्या घरामध्ये वरच्या खोलीत तिला एकटे गाठले. तिला ‘चल प्यार करेंगे’ असे म्हणाला. तिने त्याला नकार दिला असता त्याने तिला लोखंडी रॉडचा धाक दाखवला. स्वतःचे आणि तिचे कपडे काढले आणि तिच्यावर बलात्कार केला. त्रास झाल्यामुळे तिने आरडाओरडा सुरू केला. स्वतःची कशीबशी सुटका करून घेतली. ती तिथून पळाली. त्याने तिला ही गोष्ट कोणाला सांगितल्यास ‘ठार मारून टाकीन’ अशी धमकी सुद्धा दिली होती.
जानेवारी 2024 मध्ये एके रात्री फिर्यादी मुलगी घरामध्ये झोपलेली असताना. त्यावेळी तिचा चुलता त्या ठिकाणी आला आणि तिच्या अंथरुणामध्ये शिरून तिच्यावर बलात्कार केला. त्यानंतर काही दिवसांनी पीडित मुलीची आई गावी गेलेली होती. त्यावेळी तिच्या वडिलांनी जबरदस्तीने तिचे चुंबन घेतले आणि तिच्यावर बलात्कार करण्याचा प्रयत्न केला. पीडित मुलीने वडिलांना विरोध केला असता त्यांनी तिला मारहाण केल्याचे फिर्यादीमध्ये नमूद करण्यात आले. अशा प्रकारे वडील तिला दररोज त्रास देत असल्याचे देखील पीडित मुलीने पोलिसांना सांगितले आहे. पुढील तपास हडपसर पोलिस करीत आहेत.
