जळगाव मिरर | ९ ऑगस्ट २०२३
राज्याच्या राजकारणात राष्ट्रवादीचे अजित पवार यांच्यासह काही आमदारांनी मुख्यमंत्री एकनाथ शिंदे व उपमुख्यमंत्री देवेंद्र फडणवीस यांच्या नेतृत्वात सत्तेत सहभागी झाल्यावर शरद पवारांच्या गटातील अनेक आमदार नाराज झाले होते. या नाराजीचा फटका आता खान्देशात शरद पवारांच्या गटाला बसला आहे.
राष्ट्रवादीचे अजित पवार यांचा गट भारतीय जनता पार्टी व एकनाथ शिंदे यांच्या शिवसेनेसोबत सत्तेत बसल्यानंतर राष्ट्रवादीचे काही माजी आमदार नाराज झाले होते त्यामुळे आज खान्देशात शरद पवार यांच्या गटातील बड्या नेत्याने पक्षाचा राजीनामा सोपविल्याने मोठे राजकीय खळबळ उडाली आहे.
धुळे शहरात शरद पवार गटाचे माजी आमदार अनिल गोटे यांनी आज पत्रकार परिषद घेत आपली भूमिका स्पष्ट केली आहे. गेल्या काही काळापासून पक्षांतर्गत असलेल्या गडबाजीमुळे त्यांची घुसमट झाली असून यापूर्वी देखील गोटे यांनी वेळोवेळी पक्षश्रेष्ठींचे जाहीर कार्यक्रमात देखील पक्षांतर्गत कलह असलेल्या गटबाजी बाबत उघड उघड नाराजी व्यक्त देखील केली होती. त्यामुळेच पक्षांतर्गत गटबाजीला कंटाळून आपण राष्ट्रवादी काँग्रेस पक्ष सोडत असल्याचे देखील ते यावेळी म्हणाले. यावेळी त्यांनी राष्ट्रवादी काँग्रेस पक्षाचे पक्ष श्रेष्ठींकडे आपला राजीनामा सुपूर्द केला आहे याबाबत पक्षप्रमुख शरद पवार यांना देखील कल्पना दिली असल्याचे गोटे यांनी स्पष्ट केले.
